Өмнөд Америкийн бүсийн сонгон шалгаруулалтын тоглолтуудын дараа Уругвай, Колумби, Парагвайн шигшээ багууд ирэх онд АНУ, Канад, Мексикт болох дэлхийн аварга шалгаруулах тэмцээнд оролцох эрхээ баталгаажуулсан талаар ESPN мэдээлэв. Уругвай болон Колумбийн багууд өрсөлдөгчөө 3:0-ээр илүүрхэж, Парагвай тэнцээний дүнд шаардлагатай оноогоо авч чадсанаар эрхээ авсан байна.

Перугийн шигшээ багийн хувьд сүүлийн хоёр тоглолтдоо зайлшгүй ялалт байгуулах шаардлагатай байсан ч Уругвайд хожигдсоноор эрхээ алджээ. Харин Колумбийн шигшээ багийн ялалтад Хамес Родригес эхний гоолыг оруулж, хоёрдугаар хагаст Жон Кордоба, Хуан Фернандо Кинтеро нар нэмэлт гоол оруулснаар Боливийн багийг буулган авсан байна.

Парагвайн шигшээ багийн хувьд энэ бол 16 жилийн дараах том амжилт юм. Тэд хамгийн сүүлд 2010 онд ӨАБНУ-д болсон ДАШТ-д оролцож, шөвгийн наймд хүрсэн ч түрүүлсэн Испанид хожигдож байсан билээ.

Мөн дэлхийн аварга Аргентины шигшээ баг Венесуэлтэй хийсэн тоглолтдоо Лионел Мессигийн хоёр гоолын ачаар 3:0-ээр ялалт байгуулж, бүсийн чансаанд тэргүүлэгч байр сууриа хадгалсан байна.

Ирэх оны ДАШТ-д нийт 48 баг өрсөлдөх бөгөөд гурван зохион байгуулагч орон шууд оролцох эрхтэй. Үлдсэн эрхүүдийг тивийн сонгон шалгаруулалтаар шийдвэрлэх бөгөөд хоёр багийн эрхийг 2026 оны гуравдугаар сард болох зургаан багийн нэмэлт тоглолтоор тодруулах юм.

Эх сурвалж: ESPN