Өнөөдрөөс яг нэг жилийн өмнөх энэ өдөр Монголын таеквондонгийн түүхэнд нэгэн шинэ хуудас нээсэн хүн бол хөдөлмөрийн баатар У.Сүрэнжав, гавьяат тамирчин Г.Болор-Эрдэнэ нар юм.

Францын Парис хотноо болсон зуны паралимпын наадмын таеквондонгийн 52 кг-д У.Сүрэнжав түрүүлж, төрийн дууллаа эгшиглүүлж, алтан соёмбот далбаагаа хамгийн өндөрт мандуулсан. Харин 63 кг-д Г.Болор-Эрдэнэ мөнгөн медалиар энгэрээ мялааж, алтан соёмбот төрийн далбаагаа Парисын тэнгэрт мандуулсан гавьяатай билээ. Тэрхүү түүхэн өдөр өнөөдөр тохиож байна.

Монголын таеквондогийн холбооноос санаачлан хоёр тамирчныхаа гавьяаг алдаршуулж, хүүхэд залуус, олон нийтэд энэ спортыг сурталчлах зорилгоор жил бүрийн наймдугаар сарын 29-нийг “Монголын таеквондогийн өдөр” болгон зарласан юм. Тиймээс тус холбооны удирдлагууд, тамирчид Д.Сүхбаатарын талбайд цуглаж, баатрууддаа хүндэтгэл илэрхийлэн үзүүлэх тоглолт зохион байгууллаа.

Үйл ажиллагаанд МТХ-ны тэргүүн дэд ерөнхийлөгч Л.Цэнгүүнжав, МТХ-г үүсгэн байгуулагч С.Ган-Эрдэнэ, гавьяат дасгалжуулагч Д.Батнасан, Монгол Улсын Хөдөлмөрийн баатар У.Сүрэнжав, Сүхбаатарын одонт, гавьяат тамирчин Г.Болор-Эрдэнэ тэргүүтэй Монголын Үндэсний шигшээ баг болон БНСУ-ын иргэн И Жаевон дасгалжуулагчтай Пүмсэ шигшээ багийн тамирчид, Монголын таеквондогийн холбооны 70 гаруй клубийн багш дасгалжуулагч, 600 гаруй тамирчин оролцсон байна.