Forbes-ийн шинэчилсэн жагсаалтаар Белорусийн нэртэй теннисчин Арина Соболенко дэлхийн хамгийн өндөр орлоготой таван тамирчны тоонд багтжээ. Тэрээр жилийн хугацаанд нийт $27,4 саяын ашиг олсон нь өнгөрсөн жилийн аравдугаар байрнаас тавдугаар байр хүртэл дэвшихэд хүргэсэн байна.

Соболенко спортын талбайгаас 12,4 сая ам.долларын орлого олсон бөгөөд үүн дээр нэмэгдэн Electrolit спортын ундаа, Chase Bank зэрэг байгууллагуудтай хамтран ажиллаж, реклам сурталчилгаанаас 15 сая ам.доллар босгосон байна. Түүнчлэн тэр Дэвид Бекхэмын үүсгэн байгуулсан IM8 хүнсний нэмэлтийн брэндэд хувь эзэмших болсон нь орлогоо өсгөхөд чухал нөлөө үзүүлжээ.

Одоогийн байдлаар Арина Соболенко WTA-ийн чансаанд 11 225 оноотой, дэлхийн нэгдүгээрт бичигдэж байгаа бөгөөд удахгүй Серена Уильямсийн 2015 онд эзэмшиж байсан 12 мянган онооны дээд амжилтыг даван гарах магадлал өндөр байна. Түүний гол өрсөлдөгч польш тамирчин Ига Свентек одоогоор 8000 орчим оноотой хоёрдугаарт бичигдэж байна.

Жагсаалтын нэгд Испанийн Карлос Алькарас $48,3 саяын орлогоор бичигдсэн бол түүний араас Итали улсын Янник Синнер $47,3 сая, АНУ-ын Коко Гауфф $37,2 сая орлогоор жагсжээ. Дөрөвдүгээрт Сербийн Новак Жокович $29,6 саяын орлогоор бичигдсэн байна.

Эх сурвалж: Forbes, OfficeLife.media