Лиссабонд болсон Аваргуудын лигийн сонгон шалгаруулах плей-оффын хариу тоглолтод “Бенфика” баг Туркийн “Фенербахче”-г 1:0-ээр хожиж, тэмцээний үндсэн шатанд шалгарлаа. Тоглолтын 35 дахь минутанд “Бенфика”-гийн хагас хамгаалагч, Туркийн шигшээ багийн тоглогч Керем Актюркоглу цорын ганц гоолыг оруулсан бол “Фенербахче”-гийн тоглогч Талиска хоёр шар хуудас авч 82 дахь минутанд талбайгаас хөөгджээ. Эхний тоглолт Истанбулд 0:0-ээр өндөрлөсөн тул хоёр тоглолтын нийлбэр дүнгээр “Бенфика” ялалт байгуулсан байна.
Үүнээс гадна Бельгийн “Брюгге”, Азербайжаны “Карабах”, Данийн “Копенгаген” багууд ч мөн үндсэн шатанд шалгарав.
Аваргуудын лигийн үндсэн шатны сугалаа өнөөдөр явагдаж, тэмцээн есдүгээр сарын 16-нд эхэлнэ. Багууд 8 тоглолт хийх бөгөөд нэг сагсанд багтсан багуудтай хоёр удаа тоглох системээр үргэлжлэх юм.
Эхний сагсанд “Парис Сен-Жермен”, “Реал”, “Барселона”, “Бавария”, “Боруссиа”, “Манчестер Сити”, “Ливерпүүл”, “Челси”, “Интер” зэрэг аваргууд багтсан бол хоёрдугаар сагсанд “Арсенал”, “Байер”, “Айнтрахт”, “Атлетико”, “Вильярреал”, “Аталанта”, “Ювентус”, “Брюгге”, “Бенфика” зэрэг хүчирхэг багууд орсон байна.
Мөн гуравдугаар сагсанд “Аякс”, ПСВ, “Наполи”, “Спортинг”, “Олимпиакос”, “Славия”, “Будё-Глимт”, “Тоттенхэм”, “Марсель”, харин дөрөвдүгээр сагсанд “Монако”, “Галатасарай”, “Юнион”, “Карабах”, “Атлетик”, “Ньюкасл”, “Пафос”, “Копенгаген”, “Кайрат” багууд тус тус багтжээ.
Эх сурвалж: ТАСС
