Холимог тулааны UFC холбооны дунд жингийн аварга Хамзат Чимаев Өмнөд Африкийн тамирчин Дрикус дю Плессиг ялсны дараа төрөлх нутаг Чеченьд хүрэлцэн ирлээ гэж ТАСС мэдээлэв. Тэрбээр тэмцээнүүдэд Арабын Нэгдсэн Эмират улсын нэрийн өмнөөс оролцдог.

Грозный хотын нисэх буудалд түүнийг Чечень улсын төрийн тэргүүн Рамзан Кадыров, хөгжөөн дэмжигчид болон албаны хүмүүс угтан авчээ. “Чимаев ялна гэдэгт би 100 хувь итгэлтэй байсан” хэмээн Р.Кадыров хэлж, аваргад шинэхэн Maybach автомашины түлхүүр гардуулан өгсөн байна.

Хоёр тамирчны цол хамгаалах тулаан энэ сарын дундуур АНУ-ын Чикаго хотод болсон UFC 319 тэмцээнд болж, шүүгчид санал нэгтэйгээр ялалтыг Чимаевт өгчээ.

Өдгөө 31 настай Чимаев ММА-ийн карьертаа 15 тулаан хийж бүгдэд нь ялсан, нэг ч ялагдаагүй амжилттай явна. Харин мөн 31 настай дю Плесси 23 ялалт, 3 ялагдалтай, өнгөрсөн 2024 оны нэгдүгээр сард аварга болж, бүсээ хоёр удаа амжилттай хамгаалаад байсан юм.

Эх сурвалж: ТАСС