ДЭМБ-ын Номхон далайн баруун бүсийн сонголтоор Монгол Улс хүүхдийн хорт хавдрын эмийн хангамжийг сайжруулах дэлхийн платформын хөтөлбөрийг хэрэгжүүлэх эхний зургаан улсын нэг болжээ.

Манай улсад жил бүр дунджаар 120-140 хүүхэд хорт хавдрын шинэ оноштой болдог бөгөөд тэдний бараг тэн хагасыг цус, тунгалгийн хавдар эзэлдэг. Харин тархи, мэдрэлийн хавдар 18 хувь, яс болон зөөлөн эдийн хавдар 8-9 хувь, бусад төрлийн хавдар 20 хувийг бүрдүүлдэг байна. Хүүхдийн хавдрын тохиолдол харьцангуй бага учраас эмийн тасалдал гарах эрсдэл өндөр байдаг төдийгүй зарим үед эмийн чанарын асуудал ч үүсдэг нь эмчилгээг бүрэн хийхэд хүндрэл учруулсаар иржээ.

Энэхүү хөтөлбөрийн хүрээнд хавдартай хүүхдүүд таван жилийн хугацаанд зайлшгүй шаардлагатай 35 нэрийн чанартай эмийг үнэ төлбөргүйгээр, тасалдалгүй авах боломжтой болж байна. Ингэснээр эмчилгээний санхүүгийн дарамт буурч, хүүхдүүдийн амь насыг аврах, эмчилгээний үр дүнг сайжруулахад томоохон алхам болох юм.

Хөтөлбөрийн хэрэгжилтийг дэмжихээр Эрүүл мэндийн яам удирдлага, чиглэл өгч ажиллах бол Эм, эмнэлгийн хэрэгслийн хяналт, зохицуулалтын газар эмийн бүртгэл, импорт, түгээлтэд хяналт тавина. Эх, хүүхдийн эрүүл мэндийн үндэсний төв эмийг хүлээн авч эмчилгээнд хэрэглэнэ. Мөн Зоонозын өвчин судлалын үндэсний төвийн дэргэдэх эрүүл мэндийн салбарын нөөцийн агуулах их хэмжээгээр ирсэн эмийг зохих горимын дагуу хадгалах үүрэг хүлээж байна.

Ингэснээр Монгол Улс хавдартай хүүхдүүдэд чанартай, найдвартай эмийг тогтвортой, хүртээмжтэй хүргэх нөхцөлийг бүрдүүлж, тэдний амь насыг аврах, эрүүл мэндийг хамгаалахад дэлхийн түвшний чухал дэмжлэг авч байна.

Эх сурвалж: Эрүүл мэндийн яам