Казахстан улсын нийслэл Астана хотноо наймдугаар сарын 21-25-нд пара бочигийн дэлхийн цуврал тэмцээн зохион байгуулагдана. Манай улсаас энэ удаагийн тэмцээнд Үндэсний шигшээ багийн дасгалжуулагч С.Алтанхундагын удирдлага дор тамирчин Т.Мөнхдэмбэрэл ВС-1 ангилалд өрсөлдөхөөр бэлтгэл сургуулилтаа базааж байна.
Пара бочигийн дэлхийн цуврал нь жил бүр олон удаа зохион байгуулагддаг бөгөөд тамирчдад зуны паралимп болон Азийн зуны паралимпын наадамд оролцох эрхийн чансаа цуглуулах чухал боломж олгодог. Т.Мөнхдэмбэрэл өмнө нь 2024, 2025 онд энэ цувралаас мөнгөн медаль хүртэж байсан амжилттай.
Өдгөө тэрээр дэлхийн чансаанд 18-д эрэмбэлэгдэж байгаа бөгөөд хэрэв эхний 10-15-д багтаж чадвал “Лос-Анжелес-2028” зуны паралимпын наадамд оролцох эрх авах боломж нээгдэнэ хэмээн Биеийн тамир, спортын улсын хороо мэдээллээ.
Эх сурвалж: Биеийн тамир, спортын улсын хороо
