Ерөнхий сайд Г.Занданшатар 2025-2026 оны намар, өвөлжилтийн бэлтгэл ажлын явцтай танилцах үеэр Эрүүл мэндийн яамны Төрийн нарийн бичгийн дарга Д.Очирбат “Улирлын томуугийн вакцины 300 мянган хүн тунг худалдан авсан” хэмээв.

ДЭМБ-аас 2025-2026 онд зөвлөмж болгосон улирлын томуугийн вакцины нийт 300 мянган хүн тунг НҮБ-ын Хүүхдийн сан болон дотоод ханган нийлүүлэгчээр дамжуулан худалдан авсан байна. Эхний ээлжийн 135 мянган хүн тунг ирэх долоо хоногт, дараагийн ээлжийн 165 мянган хүн тунг ирэх сарын эхний хагаст хүлээн авахаар төлөвлөжээ. 

Улаанбурханы эсрэг нөхөн дархлаажуулах ажлыг эрчимжүүлж, нөхөн дархлаажуулалтад 10 сараас 15 насны хүүхдийн 55 хувийг хамруулсан байна. Отор нүүдлээр өөр аймгийн нутагт яваа иргэдэд харьяалал харгалзахгүй эмнэлгийн тусламж үзүүлэх чиглэлийг аймгуудын Эрүүл мэндийн газарт хүргүүлэн мэргэжлийн арга зүйгээр хангасан аж.