Италийн Удине хотын “Фриули” цэнгэлдэх хүрээлэнд болсон УЕФА-гийн Супер цомын төлөөх тоглолтод Францын “Пари Сен-Жермен” баг Английн “Тоттенхэм”-ийг торгуулийн цохилтоор 4:3 харьцаагаар хожиж, түүхэндээ анх удаа түрүүллээ. Үндсэн цагт тоглолт 2:2-оор дуусахдаа ПСЖ-ээс Ли Кан Ин (85’), Гонсалу Рамуш (90+4’) нар, харин “Тоттенхэм”-ээс Микки ван де Вен (39’), Кристиан Ромеро (48’) нар гоолдсон юм.
Өнгөрсөн улиралд ПСЖ анх удаа Аваргуудын лигт, “Тоттенхэм” Европын лигт аваргалсан бөгөөд энэ нь хоёр багийн Супер цомын анхны учраа байв. ПСЖ 1996 онд Цомтой багуудын цомын тэмцээний ялагчийн хувиар оролцож байсан ч Италийн “Ювентус”-т ялагдаж байжээ. Харин энэ удаад Данийн дасгалжуулагч Томас Франкийн удирдлага дор албан ёсны эхний тоглолтоо хийж түрүүлэв.
ПСЖ-ийн хаалгач Матвей Сафонов сэлгээнд суусан бол энэ сарын 9-нд “Лилль”-ээс ирсэн Люка Шевалье хаалгыг манажээ. “Тоттенхэм” энэ удаа Супер цомд анх удаа өрсөлдсөн бөгөөд Английн Премьер лигт амжилтгүй тоглосны дараа Австралийн дасгалжуулагч Ангелос Постекоглуг халж, шинэ дасгалжуулагчийн дор гараагаа эхлүүллээ.
УЕФА-гийн Супер цом 1972 оноос хойш зохион байгуулагдаж байгаа бөгөөд Испанийн “Реал Мадрид” зургаан удаа түрүүлснээр хамгийн өндөр амжилттай баг хэвээр байна.
Эх сурвалж: ТАСС
