Японы боксын салбарынхан хоёр тамирчин нас барсантай холбоотойгоор мягмар гарагт яаралтай хуралдахаар болжээ. Наймдугаар сарын 2-нд Токиогийн “Korakuen Hall” танхимд болсон тэмцээнд оролцсон хэт хөнгөн жингийн тамирчин Шигэтоши Котари болон хөнгөн жингийн тамирчин Хиромаса Үракава нар тэмцээний дараа тархины мэс засалд орсон ч хэдхэн хоногийн дараа амиа алдсан байна. Энэ нь Японд мэргэжлийн боксын аюулгүй байдал, хяналттай холбоотой асуудлыг дахин сөхөгдөхөд хүргэв.

Японы боксын комисс, спортын клубуудын эзэд болон тус салбарын холбогдох албаныхан болсон үйл явдлын талаар авч хэлэлцэхээс аргагүй нөхцөл байдал үүссэн тул яаралтай уулзалт хийхээр болжээ. Мөн ирэх сард аюулгүй байдал, тамирчдын эрүүл мэндийг хамгаалах чиглэлээр нэмэлт арга хэмжээ авч хэлэлцэхээр төлөвлөж буйг Японы хэвлэлүүд онцолж байна. Японы боксын комиссын ерөнхий нарийн бичгийн дарга Цүёши Ясүкочи ням гарагт сэтгүүлчдэд мэдээлэл өгөх үеэрээ "Бид энэ спортыг хариуцдагийн хувьд үүрэг, хариуцлагаа ухамсарлаж байна. Боломжит бүх арга хэмжээг авна" гэж мэдэгджээ.

Японы хэвлэлүүд тэмцээний өмнө жингээ бууруулахын тулд тамирчид шингэн зүйл хэрэглэхээс татгалздаг талаар онцлон мэдээлж байна. "Asahi Shimbun" сонинд дурдсанаар шингэн дутагдалд орох нь тархинд цус харвах эрсдэлийг нэмэгдүүлдэг аж. Энэ нь тамирчдын аюулгүй байдалд хамгийн их нөлөөлж болзошгүй хүчин зүйлсийн нэг бөгөөд яаралтай анхаарах шаардлагатайг илтгэж байна. Мөн "Nikkan Sports" сонинд бичсэнээр, боксын комисс болон албаныхан бэлтгэл сургуулилтад оролцдог багш дасгалжуулагч нараас тулааны өмнөх нөхцөл байдал, жингээ хасах аргачлал зэрэгт ямар хүчин зүйлс нөлөөлж болох талаар дэлгэрэнгүй мэдээлэл авахаар төлөвлөж байна.

Холбогдох байгууллагуудын зүгээс эхний алхам болгон “Oriental and Pacific Boxing Federation” холбооны аваргын төлөөх бүх тулааны раундын тоог 12-аас 10 болгож бууруулах шийдвэрийг гаргаад байна. Энэ нь боксын салбарт аюулгүй байдлыг нэмэгдүүлэх, цаашид ижил төстэй эмгэнэлт явдал гарахаас сэргийлэх зорилготой гэж үзэж байна.

Эх сурвалж: AFP, Asahi Shimbun, Nikkan Sports