БНХАУ-ын Чэндү хотын “Тяньфу” олон улсын хурлын төвд дэлхийн 12 дахь удаагийн спортын наадмыг пүрэв гаргийн орой БНХАУ-ын Төрийн Зөвлөлийн гишүүн Шэнь Ичин албан ёсоор нээж зарлалаа. Азидаа хамгийн томд тооцогдох, дан модоор барьсан 430 метр урт “Tianfu Roof” байгууламжид болсон нээлтийн ёслолд 10 мянга орчим үзэгч хүрэлцэн ирсэн бөгөөд Олон улсын дэлхийн спортын наадмын холбооны тэргүүн Хосе Перурена, Олон улсын олимпын хорооны гүйцэтгэх зөвлөлийн гишүүн Ли Линвэй нар оролцов.

Ёслолын оргил мөчид Хятадын усан цанын тамирчин Сюй Лу, Алу Шиаобо нар галт бамбарыг барин усан дээгүүр гулгаж, нуураас урсах усны хэлбэртэй зохион бүтээсэн наадмын тогоог асаав. Энэ мөчид тэнгэрт өнгө бүрийн салют буудуулан ёслолын буудлага хийжээ. “Хил хязгааргүй спорт, тоо томшгүй гайхамшиг” уриан дор наймдугаар сарын 7-17-нд үргэлжлэх уг наадам Хятадын эх газарт анх удаа зохион байгуулагдаж буйгаараа онцлог бөгөөд Чэндү хот 2023 онд Дэлхийн оюутны спортын универсиад наадмыг амжилттай зохион байгуулсны дараа энэхүү арга хэмжээг хүлээн авч байна.

Энэ удаагийн тэмцээнд 116 улс, бүс нутгаас нийт 6679 тамирчин, албаны хүн оролцож, 3942 тамирчин спортын 34 төрөлд багтсан 256 тэмцээнд өрсөлдөнө. Хятад улс түүхэндээ хамгийн өргөн бүрэлдэхүүнтэй багаа илгээж, нийт 489 хүний 321 нь тамирчид байна. Олон улсын олимпын хорооны тэргүүн Кирсти Ковентри мэндчилгээ дэвшүүлэхдээ Хятадын зохион байгуулагчдын мэргэжлийн ур чадвар, зочломтгой зан, Чэндү хотын оршин суугчид болон сайн дурынхны дэмжлэгийг онцлон талархал илэрхийлэв. Харин Хосе Перурена Чэндү хотыг “бүх хүлээлтээс давсан” хэмээн үнэлж, шинэ байгууламж барилгүйгээр Универсиад наадмын зориулалтын байгууламжийг сайжруулан ашиглаж буйг сайшаан тэмдэглэлээ.

Эх сурвалж: China Daily