Монгол Улсын Ерөнхийлөгч Ухнаагийн Хүрэлсүхийн ивээл дор зохион байгуулсан Мас-рестлингийн VII удаагийн дэлхийн аварга шалгаруулах тэмцээн 2025 оны долоодугаар сарын 31-нээс наймдугаар сарын 3-ны өдрүүдэд Архангай аймгийн төвийн “АРА” комплекс болон “АРА” аренад амжилттай боллоо. Энэ нь тус спортын дэлхийн түвшний тэмцээн орон нутагт анх удаа зохион байгуулагдсан тохиолдол бөгөөд Монгол Улсын соёл, спорт, аялал жуулчлалын нэгдмэл бодлогын хүрээнд онцгой үүрэгтэй үйл явдал боллоо.

Уг тэмцээнд 33 орны 300 орчим тамирчин оролцож, Монгол Улсаас 66, ОХУ-аас 60, Киргизээс 34 тамирчин оролцсон нь өргөн бүрэлдэхүүнтэй оролцсон улсын тоонд багтжээ. Нэгдсэн дүнгээр Оросын баг тэргүүн байр, Киргиз улсын баг дэд байр, Монгол Улсын баг гутгаар байрт шалгарч, Монголын баг тамирчид 5 алт, 10 мөнгө, 36 хүрэл медаль хүртэж нийт 51 медальтайгаар өндөр амжилт гаргалаа. Түүнчлэн өсвөр үеийн ангилалд манай тамирчид 2 алт, 5 мөнгө, 11 хүрэл медаль авч 18 медалийн эзэн боллоо.

Тэмцээний хүндэт зочдоор ОХУ-ын Холбооны зөвлөлийн гишүүн А.К.Акимов, Мас-рестлингийн холбооны Ерөнхийлөгч, Якут улсын “Ил Тумэн” их хурлын дарга А.И.Еремеев, Биеийн тамир, спортын сайд Л.Н.Спиридонов, олимпын аварга П.П.Пинигин тэргүүтэй зочид оролцсон нь тэмцээний нэр хүнд, олон улсын хэмжээнд хүрсэн цар хүрээг илтгэнэ.

Зохион байгуулалтад үнэтэй хувь нэмэр оруулсан зочид, албаныхан, тамирчдад Соёл, спорт, аялал жуулчлал, залуучуудын яам болон Засгийн газраас шагнал гардуулав. Тухайлбал, ССАЖЗЯ-ны жуух бичгээр Л.Н.Спиридонов, П.П.Пинигин, И.Ю.Григории нарыг шагнаж, “Биеийн тамир, спортын тэргүүний ажилтан” цол тэмдгийг Архангай аймгийн БТСГ-ын нягтлан бодогч Г.Нэргүй, Монголын мас-рестлингийн холбооны Ерөнхийлөгч Э.Мөнхсүрэн, дэлхийн аварга Х.Мөнхтуяа нарт олгов.

Тэмцээний үеэр зохион байгуулсан “Хүннү хаан” театрчилсан урлагийн тоглолт, “АРА” фестиваль нь зөвхөн спортын арга хэмжээ бус үндэсний соёл, өв уламжлалаа олон улсад сурталчилсан чухал үйл ажиллагаа боллоо. Энэ нь Монголын соёл, спорт, аялал жуулчлалын нэгдсэн брэнд бүтээх зорилгыг биелүүлэх нэг алхам болсон юм.

Тэмцээнийг Монгол Улсын Ерөнхийлөгчийн Тамгын газар, ССАЖЗЯ, Архангай аймгийн ЗДТГ, Монголын мас-рестлингийн холбоо хамтран амжилттай зохион байгуулсан нь орон нутгийн чадамж, бүтээлч оролцоог тод харууллаа.

Эх сурвалж: president.mn, culture.gov.mn