Халдварт өвчин судлалын үндэсний төвөөс мэдээлснээр, 2025 оны наймдугаар сарын 6-ны байдлаар улаанбурхан өвчний нийт батлагдсан тохиолдол 13157 болжээ. Үүнээс 13047 хүн бүрэн эдгэрсэн бол 58 хүн гэрээр эмчлүүлж байна. Эмнэлэгт хэвтэн эмчлүүлж буй 58 хүн байгаагаас 8 нь хөнгөн, 48 нь дунд, 2 нь хүнд хэлбэрийн оноштой байна. Харин уг өвчнөөс шалтгаалан 10 хүн нас барсан нь албан ёсоор бүртгэгдээд байна.
Өвчний хавьталд орсон нийт хүний тоо 96710 хүрсэн бол хамгийн их өвчлөл бүртгэгдсэн насны бүлэг нь 10-14 нас байгаа бөгөөд 4994 тохиолдол бүртгэгджээ. Мөн 0-4 насныхан 2928, 5-9 насныхан 1662 тохиолдлоор өвдсөн байна.
Улаанбурхан нь ханиаднаас илүү хялбар дамждаг, агаар дуслын замаар халдварладаг, өндөр халууралт, тууралт үүсгэдэг өвчин юм. Гэвч энэ нь хоёр тунт вакцинд бүрэн хариу өгдөг, сэргийлэх боломжтой халдварт өвчний нэг учраас эрүүл мэндийн байгууллагууд иргэдийг дархлаажуулалтад идэвхтэй хамрагдахыг уриалж байна. Хүүхдүүдэд вакцин хийлгэх хугацааг хойшлуулахгүй, хамт олны дархлаа бүрдүүлэх нь өвчний тархалтыг хязгаарлах цорын ганц үр дүнтэй арга хэмээн мэргэжилтнүүд онцолж байна.
Эх сурвалж: ХӨСҮТ
