Дорнод аймгийн хэмжээнд улаанбурханы 23 тохиолдол бүртгэгдэж, эдгээрийн 71.5 хувь нь огт дархлаажуулалтад хамрагдаагүй, 4.9 хувь нь вакцин хийлгэх насанд хүрээгүй, 7.8 хувь нь зөвхөн нэг тун вакцин хийлгэсэн хүүхдүүд байгааг Бүсийн оношлогоо эмчилгээний төвөөс мэдээллээ. Аймгийн хэмжээнд гарсан голомтын дархлаажуулалтыг 86 хувийн хамралттайгаар гүйцэтгэсэн ч халдварын тоо нэмэгдэх хандлагатай байгаа тул “Улаанбурхан өвчний эсрэг нөхөн дархлаажуулалтыг эрчимжүүлэх өдөрлөг”-ийг зохион байгуулжээ.

Энэхүү өдөрлөгөөр 0-15 насны, товлолт дархлаажуулалтаас хоцорсон хүүхдүүдийг улаанбурханы эсрэг вакцинд хамруулахын зэрэгцээ дархлаажуулалтын ач холбогдлыг иргэдэд ойлгуулах, мэдээлэл сурталчилгааг өргөн хүрээнд хүргэх зорилготой байсан байна. Мөн аймгийн төвийн өрхийн эрүүл мэндийн төвүүд болон 13 сумын эрүүл мэндийн төвүүд хамтран оролцож, нөхөн дархлаажуулалтыг зохион байгуулсан байна.

Ташрамд дурдахад, улсын хэмжээнд улаанбурханы тархалт эрчимтэй өсөж, зургадугаар сарын хорин есний байдлаар нийт арван мянга таван зуун дөчин хоёр тохиолдол бүртгэгдээд байна.