“Нүүдэлчин” дэлхийн соёлын фестиваль энэ оны наймдугаар сарын 22-24-нд Улаанбаатар хотын Налайх дүүргийн гуравдугаар хорооны нутаг, Тайж хайрханы бэлд дөрөв дэх удаагаа зохион байгуулагдана. Энэхүү наадам нь Монголын соёл, уламжлалт урлаг, спортын өвийг олон улсад сурталчлах, үндэсний дархлааг бэхжүүлэх, соёлын хамтын ажиллагааг гүнзгийрүүлэх зорилготой юм.

Энэ удаагийн наадмын тодотгол нь Монголын уламжлалт харваа болох “Бөмбөг намнаа” төрөл Дэлхийн аваргын албан ёсны төрөлд анх удаа багтаж буй явдал юм. Ийнхүү “Бөмбөг намнаа” төрөл дэлхийн анхаарлыг татаж, 30 гаруй орны 170 гаруй шилдэг харваач оролцох урьдчилсан төлөвлөгөөтэй байна.

Фестивалийн хүрээнд зохион байгуулагдах Морьт харвааны 17 дахь удаагийн Дэлхийн аварга шалгаруулах тэмцээн нь энэ удаагийн наадмын төв үйл ажиллагаа байх бөгөөд Монгол Улсаас 15 шилдэг харваач оролцож, олон улсын зэрэглэлтэй шүүгчид, ЮНЕСКО болон Дэлхийн Морьт Харвааны Холбооны удирдлагууд хүрэлцэн ирэхээр төлөвлөжээ.

Тэмцээнийг Монголын Үндэсний Морьт Харвааны Нэгдсэн Холбоо зохион байгуулж байгаа бөгөөд энэхүү үйл ажиллагаа нь:

• ЮНЕСКО-гийн 2003 оны “Соёлын биет бус өвийг хамгаалах тухай” Конвенц

• Монгол Улсын Соёлын өвийг хамгаалах тухай хуулийн 39.2 дахь заалт

• Монгол Улсын Засгийн газрын 2024 оны 41 дүгээр тогтоол
  зэрэг бодлогын баримт бичгийн хэрэгжилтийг хангах зорилготой юм.

Фестивалийн цар хүрээ, олон улсын оролцогчдын тоо, соёлын биет бус өвийг сэргээн таниулах ач холбогдлоороо “Нүүдэлчин” наадам нь Монгол Улсын соёл, спортын дипломат бодлогын томоохон арга хэмжээний нэг болон өргөжиж байна.

Эх сурвалж: Соёл, урлагийн газар.