Монгол Улсын нийслэл Улаанбаатар хотын төв талбайд болж буй 3х3 сагсан бөмбөгийн насанд хүрэгчдийн дэлхийн аварга шалгаруулах тэмцээн өнөөдөр гурав дахь өдрөө үргэлжилж байна. Тэмцээний хүрээнд өнөөдөр нийт 20 тоглолт болох бөгөөд үүнд Монголын эрэгтэй шигшээ багийн хоёр чухал тоглолт багтжээ.

Монголын баг 18:00 цагт Монтенегро, 20:15 цагт Японы багтай тоглох хуваарьтай байна. Энэ нь манай багийн хэсгийн сүүлийн хоёр тоглолт бөгөөд аль алийг нь хожсон тохиолдолд хасагдах шатанд шалгарах боломжтой юм. Харамсалтай нь, багийн гол тоглогч Э.Дөлгөөн шилбэний булчингийн бэртлийн улмаас өнөөдрийн тоглолтуудад оролцох боломжгүй болжээ. Ийнхүү А.Ананд, Д.Дэлгэрням, О.Энхбаатар нарын бүрэлдэхүүн сэлгээгүйгээр хоёр тулаанд оролцох боллоо.

Нөгөө талаас, эмэгтэй шигшээ баг өчигдөр хэсгийн эхний хоёр тоглолтоо хийж Бразилын багийг 16:14-өөр хожсон ч Испанийн багт 10:20-оор хожигдсон байна. Испанийн баг нь олимпын мөнгөн медальт баг гэдгээрээ анхаарал татаж буй.

Тэмцээн долоодугаар сарын 29-нийг хүртэл үргэлжлэх бөгөөд Монголын багийн өнөөдрийн тоглолтууд хасагдах шатны хувь заяаг шийдэх учраас сагсан бөмбөг сонирхогчдын анхаарлын төвд байна.

Эх сурвалж: Монголын сагсан бөмбөгийн холбоо, ДАШТ зохион байгуулагчид