БНХАУ-ын Бээжин хотноо болж буй пара пауэрлифтингийн хэвтээ шахалтын дэлхийн цомын тэмцээнд Монгол Улсаас үндэсний шигшээ багийн ахлах дасгалжуулагч Д.Баттулга, дасгалжуулагч Б.Энхбаяр нарын удирдлага дор таван тамирчин оролцож, өндөр амжилт үзүүллээ. Манай багийн тамирчид дөрвөн медаль хүртэж, хоёр алтан, нэг мөнгөн, нэг хүрэл медалиар бахархалтайгаар эх орныхоо нэрийг дэлхийд дуурсгав.
Эрэгтэйчүүдийн 107 кг-ын жинд хүч сорьсон паралимпын гурван медальт, хөдөлмөрийн баатар, гавьяат тамирчин Э.Содномпилжээ цээжнээс 232 кг шахаж, алтан медаль хүртэн төрийн дууллаа эгшиглүүлсэн юм. Энэхүү ялалт нь түүний хувьд дэлхийн цомын долоо дахь алтан медаль болж байна.
Мөн залуучуудын 54 кг-ын жинд үндэсний шигшээ багийн тамирчин Д.Жигмэд гайхалтай амжилт гаргаж, эхний өргөлтөөр Азийн залуучуудын дээд амжилтыг шинэчилж, сүүлийн өргөлтөөр залуучуудын дэлхийн дээд амжилтыг тогтоон, алтан медаль хүртжээ. Түүнчлэн насанд хүрэгчдийн ангиллын 54 кг-д нийт 443 кг-ыг шахаж, мөнгөн медалийн эзэн болсон байна.
Насанд хүрэгчдийн 59 кг-ын жинд үндэсний шигшээ багийн тамирчин Б.Алтангэрэл 333 кг-ын нийлбэр дүнтэйгээр хүрэл медаль хүртжээ.
Пара пауэрлифтингийн дэлхийн цомын тэмцээн өнөөдөр өндөрлөж байгаа бөгөөд Монголын шигшээ баг олон улсын тавцанд ахин нэгэн бахархам амжилт бүтээж чадлаа.
Эх сурвалж: Монголын Паралимпын хороо
