Швейцарын Лозанна хотод өнөөдөр болсон ёслолын үеэр Олон улсын Олимпын хорооны (ОУОХ) Ерөнхийлөгч Томас Бах өөрийн залгамжлагч Кирсти Ковентрид албан ёсоор хүлээлгэн өгч, төв байрны бэлгэдлийн түлхүүрийг гардуулан өглөө. Өдгөө 71 настай Т.Бах 2013 оноос хойш 12 жилийн турш энэ хариуцлагатай албыг хашсан бөгөөд “би Олимпын хөдөлгөөнд өөрийн чадах бүхнийг өгсөн” хэмээн үг хэлэхдээ онцлон тэмдэглэлээ.

Түүний удирдлага дор Олимпын байгууллага сэргээшийн хэрэг, цар тахлын улмаас цуцлагдсан болон хойшилсон Олимп, Оросын шигшээ багийн оролцоог хязгаарласан шийдвэр зэргээр олон сорилттой тулгарсан. Т.Бахын Оросын Ерөнхийлөгч В.Путинтэй найрсаг харилцаатай, Хятадын хүний эрхийн асуудалд хүлцэнгүй ханддаг хэмээн шүүмжлэл хүлээж байсан ч түүнийг ОУОХ-ны хүндэт ерөнхийлөгчөөр сонгосон байна.

Шинэ ерөнхийлөгч Кирсти Ковентри нь Зимбабве улсын усанд сэлэлтийн Олимпын хошой аварга, мөн тус улсын Спорт, соёл урлагийн сайд юм. Тэрбээр энэ оны гуравдугаар сарын 20-нд Грект болсон ОУОХ-ны 144 дүгээр чуулганаар 97 гишүүний 49-ийн дэмжлэгийг авч сонгогдсон бөгөөд ийнхүү ОУОХ-ны түүхэнд анхны эмэгтэй болон Африк тивийн анхны төлөөлөл болсон юм. Германы спортын мэдээллийн SID агентлаг Ковентриг "Т.Бахын бодлогыг үргэлжлүүлэх хүн" хэмээн тодорхойлсон нь анхаарал татаж байна.

Ковентри улс орнуудын шигшээ багуудыг Олимпоос хасахтай холбоотой байр сууриа илэрхийлэн, зэвсэгт мөргөлдөөний улмаас тамирчдыг шийтгэх нь шударга бус гэж үзэж байгаагаа мэдэгдсэн юм. Тэрбээр Оросын тамирчдыг бие даасан статустайгаар оролцуулах шийдвэрийг дэмжиж буйгаа илэрхийлсэн ч энэ нь Лос-Анжелес 2028 Олимпын наадамд Оросын шигшээ оролцох боломжийг баталгаажуулж буй хэрэг биш болохыг Politico тэмдэглэсэн байна.

Эх сурвалж: DW