Сагсан бөмбөгийн 3х3-ын эмэгтэйчүүдийн дэлхийн цуврал тэмцээн өнөөдөр буюу 2025 оны 6-р сарын 19-нд хоёр дахь өдрөө үргэлжилнэ.

Тус тэмцээнд АНУ, Сингапур, Канад, Япон, Филиппин, Австри, Герман, Украин, Австрали зэрэг улсын шилдэг багуудаас гадна Монгол Улсын гурван баг оролцож байна. Өчигдөр хэсгийн тоглолтууд өндөрлөж, АНУ, Канад, Япон, Австри, Герман, Украин, Австрали, мөн Монголын "Улаанбаатар Амазонс" баг хасагдах шат буюу шөвгийн наймд шалгарчээ.

"Улаанбаатар Амазонс" баг хэсэгтээ Филиппинийг 21:16-аар хожиж, Австрийн багт хожигдсон юм. Тэд өнөөдөр 16:35 цагт шөвгийн наймд Украины багтай тоглоно. Багийн бүрэлдэхүүнд О.Хулан, Б.Ариунцэцэг, М.Булбул, Н.Нандинхүсэл нар багтсан.

Харин Монголын шигшээ болон "Амгалан U24" багийнхан хэсгийн шатнаас шалгарч чадалгүй тэмцээнээ өндөрлүүлжээ. Эмэгтэйчүүдийн дэлхийн цувралын аварга баг өнөөдөр тодорно.

Удахгүй болох тэмцээн: Маргааш буюу 6-р сарын 20-нд эрэгтэйчүүдийн "Их дуулга" ангиллын тэмцээн эхлэх бөгөөд 3х3 мэргэжлийн түвшний дэлхийн хамгийн өндөр чансаатай 12 баг оролцоно. Манай улсаас "Улаанбаатар Энержи", "Завхан Сайнскор" багууд энэхүү тэмцээнд өрсөлдөхөд бэлэн болжээ.