Сагсан бөмбөгийн 3х3 төрлийн дэлхийн аварга шалгаруулах тэмцээн Улаанбаатар хотноо эхлэхэд долоо хоног үлдээд байна. Энэхүү нэр хүндтэй тэмцээнд 30 гаруй орны шилдэг багууд оролцоно. Монгол Улсын эрэгтэй, эмэгтэй шигшээ баг үндсэн бүрэлдэхүүнээрээ оролцохоор албан ёсоор бүртгэгдлээ.

Эрэгтэй шигшээ багийг олон улсын чансааг тэргүүлж буй тоглогч Д.Дэлгэрням, О.Энхбаатар, Э.Дөлгөөн, А.Ананд нар бүрдүүлж байгаа нь манай баг өрсөлдөх чадвартай, туршлагатай бүрэлдэхүүнтэй гэдгийг харуулж байна. Харин үлдсэн тоглогчид бэлтгэлийн оролцоогоороо “Их дуулга”-д оролцох юм.

Эмэгтэй шигшээ багийн хувьд өргөтгөсөн 10 тоглогчоос сонгогдсон О.Хулан, Б.Ариунцэцэг, М.Цэрэнлхам, Н.Нандинхүсэл нар тэмцээнд оролцохоор болсон байна. Баг тамирчид “М банк арена”, “Сэлбэ”, “Уран ган” заалуудад сүүлийн шатны бэлтгэлээ хангаж байгаа бөгөөд анхны тоглолтууд энэ сарын 23-наас эхэлнэ.

Монголын багуудын тоглолтын хуваарь дараах байдалтай:

• Зургаадугаар сарын 23: Монгол–АНУ (эрэгтэй) – 18:25

• Зургаадугаар сарын 23: Латви–Монгол (эрэгтэй) – 20:15

• Зургаадугаар сарын 24: Бразил–Монгол (эмэгтэй) – 18:25

• Зургаадугаар сарын 24: Монгол–Испани (эмэгтэй) – 20:15

• Зургаадугаар сарын 25: Монтенегро–Монгол (эрэгтэй) – 18:00

• Зургаадугаар сарын 25: Монгол–Япон (эрэгтэй) – 20:15

• Зургаадугаар сарын 26: ХБНГУ–Монгол (эмэгтэй) – 18:00

• Зургаадугаар сарын 26: Монгол–Украйн (эмэгтэй) – 20:15

Монголын багууд үзэгчдийнхээ дэмжлэг дор эх орондоо дэлхийн шилдгүүдтэй нүүр тулан тоглох гэж байгаагийн хувьд энэ нь зөвхөн спортын амжилт бус, улсын нэр хүндийн хэрэг бөгөөд олон нийтийн хүлээлт, хандалт өндөр байна.

Эх сурвалж: Монголын сагсан бөмбөгийн холбоо, FIBA 3x3