Монголын тулааны шилдэг тамирчдын холбооноос зохион байгуулдаг “MGL-1 Fighting Championship 22” буюу “Khangarid Cup” аваргын бүсийн төлөөх томоохон тэмцээн зургадугаар сарын 14-нд “Аса арена”-д зохион байгуулагдана. Энэхүү тэмцээнд Монголын шилдэг тулаанчид Япон, БНСУ, Бразил, Казахстан, Нигер зэрэг улс орнуудын өндөр түвшний тамирчидтай өрсөлдөж, нийт долоон тулаан явагдах юм.

Тулаануудыг АНУ, Канад, Сингапур, Монгол Улсын мэргэжлийн шүүгчид хамтран дэнслэх бөгөөд “One Championship”-ын шүүгчдийг анх удаа Монголд урьж ирүүлсэн нь онцлогтой. Энэ нь Монголын шүүгчдэд олон улсын хэмжээнд ур чадвараа дээшлүүлэх ховор боломж болж байгааг тэмцээний зохион байгуулагчид онцлов.

Хэвлэлийн хурлын үеэр гавьяат тамирчин Ж.Нарантунгалаг тэмцээнийг “Манай холбооны түүхэнд хамгийн өргөн цар хүрээтэй, олон улсын жинтэй тэмцээн” хэмээн тодорхойлж, “61 кг-ын жинд өрсөлдөх Ш.Одсүрэн, Б.Шинэбаатар нар хоёулаа ялагдалгүй яваа шилдэг тулаанчид юм. Ш.Одсүрэн нь Оросын “Иппон Примори” холбооны аварга болсон Монголын цор ганц тулаанч. Харин Б.Шинэбаатар Японы ‘Гладиатор’ холбооны бүсний төлөө тулаанд ялалт байгуулсан ч жиндээ орж чадаагүй учраас бүсээ авч чадаагүй” хэмээн онцолсон. Тулаанд ялалт байгуулсан тамирчид гэрээний дагуу шагналаа хоёр дахин нэмэгдүүлэн авах нөхцөлтэй гэв.

Мөн энэ тэмцээн Монголын тулаанчдын ур чадварыг ахиулах, олон улсын тавцанд илүү хүчтэй байр суурь эзлэх боломжийг бүрдүүлж байгааг дурдсан юм. 2011 оноос эхлэн гадаад тамирчдыг урьж оролцуулж ирсэн тус холбоо энэ удаад аваргын бүсээ шинэчилсэн бөгөөд тэмцээн бүр илүү чанартай, олон улсын түвшинд ойртож байгааг харуулж байна.

Өдгөө “MGL-1”-ээс төрөн гарсан шилдэг тулаанчид АНУ-ын UFC, Японы Deep, Gladiator, БНХАУ-ын JCK, Азийн One Championship зэрэг нэр хүндтэй холбоонд эх орныхоо далбааг мандуулан тулалдаж буйг тэмдэглэжээ.

Эх сурвалж: MGL-1 Fighting Championship