Унгарын нийслэл Будапешт хотод зохион байгуулагдаж буй Олон улсын жүдо бөхийн холбооны (IJF) чуулганаар холбооны удирдлагын бүтцэд шинэчлэл хийж, бодлого төлөвлөлтийн олон чухал асуудлыг хэлэлцлээ. Энэ удаагийн чуулганы гол онцлох үйл явдал нь IJF-ийн тэргүүний сонгууль байсан бөгөөд Мариус Визер зургаа дахь удаагаа улиран сонгогдож, дахин дөрвөн жил холбоог удирдах эрхтэй боллоо.

Чуулганы хүрээнд 2025-2029 онд ажиллах Гүйцэтгэх зөвлөлийн шинэ бүрэлдэхүүнийг баталсан бөгөөд Япон, Франц, Узбекистанаас тус бүр хоёр, мөн Мальта, Чех, Испани, Замби, Унгар, Румын, Алжир, Словен зэрэг улсаас тус бүр нэг гишүүн багтжээ. Энэ нь жүдо бөхийн хөгжлийг олон улсын түвшинд тэгш төлөөлөлтэй байлгахыг зорьж буйг илтгэнэ.

Мөн чуулганаар 2026, 2027, 2028 оны Дэлхийн аварга шалгаруулах тэмцээнийг зохион байгуулах орнуудыг танилцуулж, 2028 оны Лос Анжелесын олимпын жилийн ДАШТ-ийг Бахрейнд зохион байгуулахаар хэлэлцээрийн шатанд байгааг мэдэгдсэн байна.

Түүнчлэн жүдо бөхийн дэлхийн болон олимпын чансааны онооны шинэчилсэн журам танилцуулагдаж, IJF-ийн бүртгэлд орсон 177 орны 10,291 тамирчнаас ердөө 372 нь Лос-Анжелесын олимпын эрхийн оноонд хамрагдахаар байгааг онцолжээ. Энэ нь олимпын эрхийн төлөөх өрсөлдөөн хэр ширүүн болохыг илтгэж байна.

Чуулганы үеэр Шүүгчдийн ерөнхий зөвлөл, Санхүүгийн хэлтэс болон тивүүдийн холбоод 2023-2024 оны ажлын тайлангаа тавьж, өнгөрсөн хугацаанд хийсэн ажлаа дүгнэсэн байна.

Монгол Улсаас тус чуулганд Монголын жүдо бөхийн холбооны ерөнхий нарийн бичгийн дарга Б.Батгэрэл, үндэсний шигшээ багийн менежер Г.Болор нар оролцож, олон улсын холбооны бодлого, шийдвэртэй танилцан, түншлэлээ бататгасан нь манай жүдо бөхийн ирээдүйн оролцоо, бэлтгэл хангахад чухал нөлөөтэй үйл явдал боллоо.

Эх сурвалж: IJF, officelife.media