Олон улсын цанын холбооны (FIS) Зүүн өмнөд Азийг хариуцсан техникийн шинжээч Тацүяа Ватанабэ Монголын цанын холбооны урилгаар 2025 оны зургаадугаар сарын 7-9-ний өдрүүдэд Монгол Улсад ажиллалаа. Айлчлалын хүрээнд тэрээр Төв аймгийн Борнуур сум, Улаанбаатар хотын Багабаян зэрэг олон улсын стандарт бүхий цанын бааз байгуулахаар төлөвлөж буй байршлуудтай танилцан, газар дээр нь техник үзлэг хийсэн байна.
Шинжээч Тацүяа Ватанабэ газар зүйн байршил, байгаль орчны нөхцөл, дэд бүтцийн байдал, хөгжлийн ирээдүйг судалж, Монгол Улс олон улсын стандарттай цанын баазтай болоход боломжтой гэж дүгнэжээ. Түүний зүгээс цаашдын хамтын ажиллагааны хүрээнд хэрэгжүүлэх төсөл, төлөвлөгөөний үндсийг тавьсан нь энэ айлчлалын гол үр дүн байлаа.
Мөн айлчлалын үеэр ОУОХ-ны гишүүн, Монголын үндэсний олимпын хорооны ерөнхийлөгч Б.Баттүшиг, тэргүүн дэд ерөнхийлөгч Ч.Наранбаатар нар Тацүяа Ватанабэг хүлээн авч уулзан, өвлийн спортын дэд бүтцийн хөгжлийг бодлогын түвшинд дэмжин хамтран ажиллахаа илэрхийлсэн юм.
Цанын бааз байгуулагдсанаар Монголын тамирчид өндөр зардлаар гадаадад бэлтгэл хийх шаардлагагүй болж, дотооддоо олон улсын стандартад нийцсэн орчинд сургуулилт хийх боломж бүрдэх юм. Мөн энэхүү бааз нь цаашид олон улсын чансааны оноотой уралдаан тэмцээн зохион байгуулах нөхцөлийг бүрдүүлэх чухал ач холбогдолтой гэж мэргэжилтнүүд онцолж байна.
Эх сурвалж: Монголын цанын холбоо
