Халдварт өвчин судлалын үндэсний төвөөс өнөөдөр буюу 2025 оны зургаадугаар сарын 10-ны байдлаар улаанбурхан өвчний тархалтын нөхцөл байдлыг танилцууллаа. Нийт 6265 тохиолдол лабораторийн шинжилгээгээр батлагдаж, 656 хүн эмнэлэгт хэвтэн эмчлүүлж байна. Тэдгээрийн дунд 89 нь хөнгөн, 525 нь дунд, 37 нь хүнд байдалтай байгаа аж.
Мөн гэрийн нөхцөлд 768 хүн эмчлүүлж байгаа бол 4839 хүн бүрэн эдгэрсэн байна. Халдвартай иргэдтэй ойр байсан 36307 хүн хавьтал гэж бүртгэгдсэн бөгөөд нас баралт хоёр тохиолдол бүртгэгджээ.
Улаанбурхан өвчин нь агаар дуслаар хялбар халдварладаг бөгөөд халдварлалтын түвшин өндөртэй ч вакцинжуулалтаар бүрэн сэргийлэх боломжтой. Одоогоор ЕБС-ийн орчинд голомтлон тархаж байгаа тул хүүхдүүд, багш сурган хүмүүжүүлэгчид, эцэг эхчүүд улаанбурханы эсрэг вакциндаа хамрагдах нь өвчнөөс урьдчилан сэргийлэх гол алхам юм.
Эрүүл мэндийн байгууллагууд вакцинд хамрагдаагүй иргэдийг яаралтай дархлаажуулалтад хамрагдахыг уриалж байгаа бөгөөд нийт иргэдийг халдвараас сэргийлэх ухаалаг, хариуцлагатай үйлдэл хийхийг уриалж байна.
Эх сурвалж: ХӨСҮТ
