Испанийн шилдэг теннисчин Карлос Алькарас Францын нээлттэй тэмцээн буюу Ролан Гарросын эрэгтэйчүүдийн ганцаарчилсан төрлийн финалын тоглолтод Италийн Янник Синнерийг 3:2 харьцаагаар буулган авч, түүхэн ялалт байгууллаа. Энэхүү финал таван цаг 29 минут үргэлжилсэн нь Ролан Гарросын түүхэнд хамгийн удаан үргэлжилсэн эрэгтэйчүүдийн тоглолт болж шинэ дээд амжилт тогтоов.
Тоглолт эхэнд дэлхийн чансааг тэргүүлж буй Янник Синнер 6:4, 7:6 гэсэн харьцаатайгаар эхний хоёр сэтийг авч хүчтэй эхлэл хийсэн ч Алькарас гурав дахь сэтэд 6:4-өөр хариу авч, өрсөлдөөнд эргэн ирлээ. Дөрөв дэх сэтэд тэрбээр тоглолтын хурдыг эрс нэмэгдүүлж, 7:6-гаар ялалт байгуулснаар тоглолтын хувь заяаг тав дахь сэтэд шийдвэрлүүлэх нөхцөлийг бүрдүүлсэн юм.
Шийдвэрлэх сэт маш хурц өрсөлдөөнтэй явагдаж, Алькарас 7:6-гаар ялалт байгуулснаар хоёр дахь удаагаа Ролан Гарросын аварга болж, “Их дуулга”-ын дөрөв дэх цомоо хүртлээ. Тэрээр өмнө нь 2022 оны АНУ-ын нээлттэй тэмцээн, 2023 оны Уимблдон, мөн 2024 оны Ролан Гарросын цомыг хүртэж байсан юм.
22 настай залуу аваргын энэхүү ялалт нь түүний авьяас, бэлтгэлжилт, сэтгэл зүйн тогтвортой байдлыг дахин нэг баталж, дэлхийн теннисний шилдэгүүдийн эгнээнд гүн бат байр суурь эзлэх болсныг харууллаа.
Эх сурвалж: AFP
