Халдварт өвчин судлалын үндэсний төвөөс өнөөдөр буюу 2025 оны зургаадугаар сарын 9-ний байдлаар улаанбурхан өвчний тархалтын талаар мэдээлэл гаргалаа. Тус төвийн мэдээлснээр улаанбурхан өвчний лабораториор батлагдсан тохиолдлын тоо нийтдээ 6046-д хүрээд байна. Эмнэлэгт хэвтэн эмчлүүлж буй 616 хүнээс 142 нь хөнгөн, 430 нь дунд, 38 нь хүнд хэлбэрийн оноштой байгаа бол гэрээр эмчлүүлж буй хүний тоо 832, эдгэрсэн хүний тоо 4596 болжээ.
Халдвартай иргэдтэй ойр байсан буюу хавьтлын тоо 36 мянга гаруйд хүрсэн бөгөөд хоёр хүн нас барсан харамсалтай тохиолдол бүртгэгдээд байна.
Улаанбурхан нь халдварлах чадвар өндөртэй вирусийн гаралтай халдварт өвчин бөгөөд амьсгалын замаар ханиалгах, найтаах, ойрын хавьтал, халдварлагдсан орчин, гадаргуутай харьцах замаар маш амархан тархдаг. Гэсэн хэдий ч улаанбурхан өвчнөөс сэргийлэх хамгийн үр дүнтэй арга нь вакцинжуулалт бөгөөд олон улсад энэ өвчний эсрэг дархлаажуулалт нь халдварт өвчний эсрэг хамгийн найдвартай хамгаалалт гэж тооцогддог.
Сүүлийн үед улаанбурхан өвчин ихэвчлэн Ерөнхий боловсролын сургуулиудын орчинд буюу хүүхдүүдийн дунд голомтлон гарч байгаа тул хамт сурдаг, хамт ажилладаг хүмүүс, багш сурган хүмүүжүүлэгчид, эцэг эхчүүдийн анхаарлыг онцгойлон хандуулах шаардлагатай байна. Вакцинд хамрагдаагүй хүмүүс дархлаажуулалтад хамрагдах замаар өөрийгөө болон бусдыг хамгаалах бүрэн боломжтой.
Халдварт өвчнөөс урьдчилан сэргийлэх хамгийн үр дүнтэй арга бол дархлаажуулалт тул иргэн бүр эрүүл мэндийнхээ төлөө хариуцлагатай байж, улаанбурхан өвчнөөс сэргийлэх арга хэмжээнд идэвхтэй оролцохыг эрүүл мэндийн байгууллагаас уриалж байна.
Эх сурвалж: Халдварт өвчин судлалын үндэсний төв
