Ховд аймагт бага насны найман хүүхэд улаан бурхан өвчний халдвар авч, эмнэлэгт хэвтэн эмчлүүлж байгаа талаар орон нутгийн эрүүл мэндийн байгууллагаас мэдээлэв. Халдварын эх уурхай, дамжих хэлбэрийг тогтоох зорилгоор хийсэн тандалт судалгаагаар 351 ойрын хавьтал бүртгэгдээд байна. Эдгээр иргэдэд холбогдох зөвлөмж, тусламж үйлчилгээг үзүүлж эхэлжээ.
Улаан бурхан нь агаар дуслын замаар хурдан тархдаг, өндөр халуурах, тууралт гарах, ханиалгах зэрэг шинж тэмдгээр илэрдэг халдварт өвчин бөгөөд вакцинаар бүрэн сэргийлэх боломжтой гэдгийг мэргэжилтнүүд анхааруулж байна.
Эрүүл мэндийн байгууллагаас иргэдэд дараах урьдчилан сэргийлэх зөвлөмжийг өгчээ:
-
Олон нийтийн газар амны хаалт тогтмол зүүх
-
Бага насны хүүхдийг гадуур дагуулан явахгүй байх
-
Гараа тогтмол савандаж угаах
-
Гэр, сууцандаа хоёр цаг тутамд агаар сэлгэлт хийх
-
Чийгтэй цэвэрлэгээ тогтмол хийх
-
Амин дэмээр баялаг хоол хүнс хэрэглэх
-
9 сар болон 2 нас хүрсэн хүүхдийг улаанбурханы товлолт вакцинд заавал хамруулах
Мөн иргэн бүр эрүүл мэндийн мэдрэмжтэй, хариуцлагатай байж, халдвараас сэргийлэх нь нэн чухал гэдгийг эмч, мэргэжилтнүүд онцлон уриаллаа.
