Нийслэлийн есөн дүүргийг төлөөлсөн есөн багийн нийт хорин долоон бөх хүч үзэж буй Нийслэлийн аварга шалгаруулах 3x3 барилдааны эхний өдөр дөрвөн тойргийн барилдаан амжилттай болж өндөрлөлөө. Дүүрэг бүр гурван бөхийн бүрэлдэхүүнтэй оролцож байгаа бөгөөд барилдаан тойргийн журмаар өрнөж байна.

Багуудын бүрэлдэхүүнд улсын цолтой шилдэг бөхчүүд барилдаж буй нь тэмцээний өрсөлдөөнийг улам ширүүсгэж байна. Налайх дүүргийг улсын арслан Р.Пүрэвдагва, аймгийн арслан М.Эрхэмбаяр, харцага Н.Ширчинхүү нар төлөөлж байгаа бол Чингэлтэй дүүрэг улсын заан Б.Батмөнх, аймгийн заан Б.Бадамдорж, өсөх начин Б.Баатарболдоор бүрджээ. Багахангай дүүрэг улсын харцага О.Мөнх-Эрдэнээр ахлуулсан хүчтэй бүрэлдэхүүнтэй оролцож байна.

Эхний дөрвөн тойргийн дараах байдлаар Багануур, Багахангай, Чингэлтэй, Хан-Уул дүүргүүд тус бүр гурван ялалт авсан амжилтаар тэргүүлж байна. Багануур дүүргийн баг 7 даваа, 3 ялалттайгаар бусдыгаа манлайлж буй бол Баянгол, Баянзүрх, Налайх дүүргийн багууд өнөөдрийн барилдаануудаас ялалт аваагүй байна.

Хувийн амжилтаар:

• Улсын заан Б.Батмөнх 4 барилдаанд дараалан давж хамгийн өндөр амжилт үзүүлсэн бол

• Улсын харцага О.Мөнх-Эрдэнэ,

• Улсын өсөх идэр начин Ч.Батчулуун,

• Улсын начин Б.Даваа-Очир,

• Улсын начин Л.Энхсаруул,

• Аймгийн хурц арслан Н.Амгаланбаатар,

• Аймгийн арслан Е.Көптилек нар тус бүр 3 барилдаанд оролцож бүгдэд нь даван гарчээ.

Дараагийн дөрвөн тойргийн барилдаан ирэх зургаадугаар сарын 14-нд үргэлжилж, нийслэлийн аваргыг тодруулах сүүлийн шатны барилдаанууд явагдана.

Эх сурвалж: Нийслэлийн спорт хороо, тэмцээний зохион байгуулагчид