Эрүүл мэндийн яамны Төрийн нарийн бичгийн дарга Д.Очирбат “Вакцин Дархлаажуулалтын Глобал Альянс” буюу ГАВИ байгууллагын дунд орлоготой улс орнуудыг хариуцсан хөтөлбөрийн багийн ахлагч Тито Рвамушайжа тэргүүтэй төлөөлөгчдийг хүлээн авч уулзлаа.
Уулзалтын үеэр ГАВИ байгууллагын зүгээс Монгол Улсын дархлаажуулалтын тогтолцоо бүх шатанд бэхэжсэн, сургуульд суурилсан хэлбэрээр үр дүнтэй зохион байгуулагдаж байгааг онцлон сайшаалаа. Ялангуяа хөвгүүд, охид ялгаагүй ХПВ-ийн эсрэг вакциныг товлолд хамруулж буйг талархан хүлээн авсан байна. Мөн өрх, сумын эрүүл мэндийн төвүүдийн эмч, вакцинатор сувилагч нар өндөр ачаалалтай нөхцөлд ч дархлаажуулалтын үйлчилгээг ард иргэдэд тууштай хүргэж байгаад талархал илэрхийлжээ.
ТНБД Д.Очирбат ГАВИ-гаас үзүүлж буй техникийн болон бодлогын дэмжлэгт талархал илэрхийлээд, умайн хүзүүний хорт хавдрыг бууруулахад ХПВ-ийн эсрэг вакцин онцгой ач холбогдолтойг онцлон дурдав. Гэвч эцэг эх, асран хамгаалагчдын дунд тархаж буй буруу ташаа мэдээлэл нь дархлаажуулалтын хамралтад сөргөөр нөлөөлж байгааг хөндөж, энэ талаар зөв мэдээллийг тогтмол хүргэх шаардлагатай байгааг тэмдэглэлээ.
Цаашид хоёр тал хамтран ажиллаж, Монгол Улсад дархлаажуулалтын хамралтыг нэмэгдүүлэх, зөв ойлголтыг төлөвшүүлэх, иргэдийг баталгаатай мэдээллээр хангах чиглэлд дэмжлэг, хамтын ажиллагаагаа өргөжүүлэхээр тохиролцлоо.
Эх сурвалж: Эрүүл мэндийн яам
