Эрүүл мэндийн үйлчилгээний чанар, хүртээмжийг сайжруулах зорилтын хүрээнд Баянзүрх дүүргийн 8 дугаар хорооны нутаг дэвсгэр, Ерөнхий боловсролын 92 дугаар сургуулийн зүүн талд шинээр барьсан найман давхар эмнэлэг ашиглалтад орлоо. Энэхүү эмнэлэг нь дүүргийн зүүн бүсийн 12 хорооны иргэд, тэр дундаа өндөр настан, бага насны хүүхдүүдэд эрүүл мэндийн анхан шатны тусламжийг түргэн шуурхай хүргэх зорилготой юм.

Эмнэлгийн эхний таван давхарт амбулаторийн тусламж үйлчилгээ үзүүлж байгаа бөгөөд одоогоор 22 нэр төрлийн амбулаторийн чиглэлийн үзлэг, шинжилгээ, зөвлөгөө, оношлогоо хийгдэж байна. Харин 6-8 дугаар давхарт хэвтэн эмчлүүлэгчдийн тасгууд байрлах бөгөөд эдгээр тасаг, нэгжүүдийг үе шаттайгаар нээж, бүрэн хүчин чадлаар ажиллуулах төлөвлөгөөтэй байна.

Эмнэлэг бүрэн хүчин чадлаараа ажиллах үед жилдээ 8000 гаруй хүнд хэвтүүлэн эмчлэх тусламж, үйлчилгээг үзүүлэх боломжтой бөгөөд томуу, томуу төст өвчний улиралд нэмэлт ор дэлгэх нөхцөл ч бүрдсэн байна. Ингэснээр дүүргийн иргэд, ялангуяа эрсдэлт бүлгийн хүн амд эрүүл мэндийн үйлчилгээ илүү ойртож, цаг алдалгүй тусламж авах боломж нээгдэж байгаа нь энэ төслийн гол ач холбогдол юм.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс