Эрүүл мэндийн яамны Шинжлэх ухаан, технологийн зөвлөлийн 2025 оны зургаадугаар сарын 3-ны өдрийн 02 дугаар хуралдаанаар эрүүл мэндийн тусламж үйлчилгээнд нэвтрүүлэх дэвшилтэт технологийн тэргүүлэх чиглэлийн төсөл, арга хэмжээний саналын жагсаалтын төслийг хэлэлцлээ.

Өнгөрсөн 2024 онд Зүрх, тархины судасны тогтолцооны эмгэг, хорт хавдар, гэмтэл, согог зэрэг өвчлөлд чиглэсэн 15 төслийг сонгон шалгаруулсан бол энэ жилээс эхлэн төслүүдийг хэрэгжүүлэх түвшинг төвийн болон орон нутгийн гэж ангилан, чиглэлийн ялгаатай бодлоготойгоор хэрэгжүүлэхээр болсон нь онцлог байв.

Төв (тусгай мэргэжлийн төв, төрөлжсөн эмнэлгүүд)-ийн түвшинд 2025 оноос хэрэгжих дэвшилтэт технологийн тэргүүлэх чиглэлүүд нь Монгол Улсад одоогоор эмчлэгдэх боломжгүй гэж тооцогдож буй өвчнүүдийг дотооддоо оношлох, эмчлэх боломжийг нэмэгдүүлэхэд чиглэжээ. Үүнд:

1. Эрхтэн шилжүүлэн суулгах, эдийн биобанк байгуулах

2. Мэс заслын тусламжид дэвшилтэт технологи нэвтрүүлэх

3. Хавдрын бай эмчилгээ, судсан дотуурх мэс заслын арга

4. Төрөлхийн болон удамшлын эмгэгийн оношилгоо, эмчилгээ, генетикийн төвлөрсөн тусламж

5. Хүүхдийн мэс заслын тусламжид шинэ технологи нэвтрүүлэх

6. Хиймэл оюун ухааныг анагаахын оношилгоо, эмчилгээнд ашиглах шийдлүүд

Эдгээр чиглэлээр боловсруулагдаж буй төслүүд нь дотоодын нөөц бололцоог ашиглан, өндөр зардал, гадаад эмчилгээний хамаарлыг бууруулах, эмчилгээний чанарыг сайжруулах зорилготой гэж салбарын мэргэжилтнүүд тайлбарлаж байна.

Эх сурвалж: Эрүүл мэндийн яам