Гэмтэл согог судлалын үндэсний төвд 2025 оны зургаадугаар сарын 2-ны өдөр Тайванийн “Tri-Service” эмнэлгийн удирдлагууд болон төлөөлөгчид албан ёсоор зочилж, хамтын ажиллагааны гэрээг шинэчлэн байгууллаа. Уулзалтын үеэр хоёр байгууллагын төлөөлөл болох ГССҮТ-ийн үйл ажиллагаа хариуцсан дэд захирал Б.Батзориг, “Tri-Service” эмнэлгийн захирал Юн Хао Чиен нар хамтран санамж бичигт гарын үсэг зурсан байна.
Хамтын ажиллагааны хүрээнд дараах чиглэлүүдээр үйл ажиллагаа хэрэгжүүлэхээр тохиролцжээ:
-
Гэмтэл согогийн чиглэлээр эрдэм шинжилгээ, судалгаа хийх
-
Эмч, мэргэжилтнүүдийг сургаж, чадавхжуулах
-
Осол гэмтлээс урьдчилан сэргийлэх төслүүд хэрэгжүүлэх
-
Гэмтлийн хамтарсан сургалтын төв байгуулах
ГССҮТ болон Тайванийн “Tri-Service” эмнэлгийн хамтын ажиллагаа 2019 оноос эхлэлтэй бөгөөд өнгөрсөн хугацаанд хоёр тал хамтарсан оношилгоо, эмчилгээ, мэргэшүүлэх сургалт, эмнэлгийн ажилтнуудын харилцан солилцоо зэрэг өргөн хүрээний ажил зохион байгуулж, нийт 27 эмч, мэргэжилтнийг сургаж чадавхижуулсан байна.
Мөн 2025 оноос эхлэн Тайванийн эмч, мэргэжилтнүүдийг ГССҮТ-д зочин профессороор урих, орчин үеийн дэвшилтэт оношилгоо, эмчилгээний арга технологиос туршлага хуваалцах үйл ажиллагаа тогтмолжиж эхэлсэн байна.
Энэ удаагийн айлчлалын хүрээнд зочид ГССҮТ-ийн салбар эмнэлгийн үйл ажиллагаатай газар дээр нь танилцсан гэж тус төвөөс мэдээлэв.
Эх сурвалж: Гэмтэл согог судлалын үндэсний төв
