Казахстан улсын Астана хотод болсон пара жүдо бөхийн насанд хүрэгчдийн Дэлхийн аварга шалгаруулах тэмцээнд Монгол Улсын баг тамирчид амжилттай оролцож, хоёр хүрэл медаль хүртлээ. Тэмцээнээс медаль хүртсэн баг тамирчдыг өнөөдөр Биеийн тамир, спортын улсын хорооны дарга Э.Билэгт хүлээн авч уулзан, амжилтыг нь өндрөөр үнэллээ.
Уулзалтын үеэр тэрбээр “Ард түмнийхээ итгэл сэтгэлийг тээсэн та бүхэн дэлхийн дэвжээнд хурд хүч, авхаалж самбаа, тэсвэр хатуужил гарган анхдагч амжилтыг байгуулсан” хэмээн онцолж, тамирчдад баяр хүргэв.
Монгол Улсын шигшээ багийн дасгалжуулагч А.Мөнхбат, С.Ядамдорж нарын удирдлага дор нийт найман жүдоч оролцсон бөгөөд эмэгтэйчүүдийн 70 кг-ын жинд Л.Туруунаа хүрэл медаль хүртэж, пара жүдо бөхийн ДАШТ-ээс хос медаль хүртсэн Монголын анхны тамирчин болсон байна. Мөн манай эрэгтэй баг багийн төрөлд хүрэл медаль хүртсэн нь пара жүдо бөхийн багийн төрлөөр авсан анхны медаль болж, тэмцээний онцлох амжилтад тооцогдож байна.
Тамирчдын энэ амжилт нь Монголын пара спортын хөгжлийн түүхэнд шинэ хуудсыг нээж буйгаас гадна, олон улсын тэмцээнүүдэд өрсөлдөх чадвар, бэлтгэлийн чансааг тодорхой хэмжээнд харуулсан үйл явдал боллоо.
Эх сурвалж: Биеийн тамир, спортын улсын хороо
