Монголын сагсан бөмбөгийн үндэсний дээд лигийн есөн удаагийн аварга “Хасын Хүлэгүүд” баг түүхэндээ анх удаа Азийн аваргуудын лигийн финалын шатанд шалгарч үлдлээ. Тэд Зүүн бүсийн хагас шигшээд Индонезийн багийг долоон онооны зөрүүтэй буулган авсны дараа финалд Тайванийн аварга “Тайвань Пайлотс”-ыг 86:77-гоор хожиж, бүсийн аваргаар тодорсон юм.

Тус тоглолтын “Үнэ цэнтэй тоглогч”-оор “Хүлэгүүд”-ийн шилдэг тоглогч Иан Миллер шалгарч, Азийн аваргуудын лиг болон Монголын үндэсний лигийн финалын MVP шагналыг дараалан хүртлээ. Миллерийн өндөр үр дүнтэй тоглолт, оноо бүрдүүлэлтийн тогтвортой байдал нь багийн амжилтад гол үүрэг гүйцэтгэсэн билээ.

Зүүн бүсийн тоглолтуудыг 8 тоглолт, 8 ялалтаар өндөрлүүлсэн “Хасын Хүлэгүүд” 100 хувийн амжилттайгаар финалын шатны эрхээ авч, энэ сарын 4-нд АНЭУ-ын Дубай хотыг зорин, финалын шатны тоглолтуудад оролцох гэж байна. Финалын шатанд шилдэг 9 баг өрсөлдөх бөгөөд манай баг “А” хэсэгт багтаж, Ираны “Табиат Баскетбол” болон Хятадын “Зежиан Гуанша Лионс” багуудтай оноолт таарчээ.

Финалын шатны тоглолтууд энэ сарын 7-13-ны хооронд АНЭУ-ын Абу Даби хотод зохион байгуулагдах юм. Энэхүү түүхэн амжилт нь Монголын сагсан бөмбөгийн хөгжилд чухал түлхэц өгч, Азийн түвшинд манай улсын нэр хүндийг өсгөхүйц үйл явдал боллоо.

Эх сурвалж: FIBA Asia Champions League