Японы мэргэжлийн сумо бөхийн 69 дэх их аварга Хакүхо М.Даваажаргал буюу Миягино ояката Японы Сумогийн холбоонд халагдах өргөдлөө өгч, хүсэлтийг нь Гүйцэтгэх зөвлөл ээлжит бусаар хуралдан хэлэлцэж, албан ёсоор хүлээн авчээ. Ийнхүү тэрбээр олон жилийн хөдөлмөр, нэр хүнд, оякатагийн цол зэргийг орхин сумогийн ертөнцөөс бүрмөсөн хөндийрч байгаагаа илэрхийлж байна.
Их аваргын шийдвэрт нөлөөлсөн гол шалтгаан нь түүний шавь Хокүсэйхо А.Даваанинжийн холбогдсон хэрэг явдал бөгөөд уг хэргийн улмаас Миягино дэвжээ хаагдаж, Хакүхо зиндаа буурсан юм. Хэдийгээр Хакүхо өөрөө хэргийг үйлдээгүй ч дэвжээний ахлагчаар хариуцлага хүлээж, эцэст нь ийм шийдвэр гаргажээ.
Тэрбээр энэ сарын 9-нд Японы Токио хотноо хэвлэлийн бага хурал зарласан бөгөөд албан ёсоор олон нийтэд мэдэгдэл хийхээр болжээ. Мөн одоогоор Монгол Улсад ирээд байгаа бөгөөд маргааш буюу зургаадугаар сарын 3-нд аавынхаа, дархан аварга Ж.Мөнхбатын хөшөөний нээлтэд оролцож, өсвөрийн бөхчүүдэд шагнал гардуулах ёслолд оролцох юм.
Хакүхо М.Даваажаргал сумогийн түүхэнд хамгийн олон удаа түрүүлсэн, ялагдашгүй амжилт гаргасан аварга бөгөөд зөвхөн Монгол төдийгүй Япончуудын дунд ч хүндлэл хүлээдэг нэгэн билээ. Түүний замнал ийнхүү гэнэт төгсөж буй нь сумогийн ертөнцөд томоохон хохирол гэж үзэж болох юм.
Эх сурвалж: NHK, Nikkan Sports, Mainichi, Jiji Press, Asahi, Өнөөдөр сонин
