Монголын үндэсний бөхийн холбооноос (МҮБХ) 2025 оны зургаадугаар сард зохион байгуулах барилдаан болон арга хэмжээний хуваарийг олон нийтэд албан ёсоор танилцууллаа. Улирлын сүүлийн барилдаануудыг багтаасан энэхүү хөтөлбөрт хүндэтгэл үзүүлэх ёслол, өсвөр үеийн тэмцээн, цол олгох барилдаан, нийслэлийн аваргыг шалгаруулах 3х3 барилдаан болон наадмын сорилго зэрэг өргөн хүрээтэй үйл ажиллагаа төлөвлөгджээ.

Маргааш буюу зургаадугаар сарын 3-нд Төв цэнгэлдэх хүрээлэнд хөдөлмөрийн баатар, гавьяат тамирчин, чөлөөт бөхийн дэлхийн аваргын анхны хүрэл медальт, олимпын мөнгөн медальт, дархан аварга Ж.Мөнхбатын алдар гавьяаг мөнхлөн хүндэтгэл үзүүлэх өсвөрийн 64 бөхийн барилдаан болно. Энэ үеэр дархан аваргын хөшөөний нээлт ч болох юм.

Зургаадугаар сарын 6-нд Бүх цэргийн наадам зохион байгуулагдах бөгөөд энэ нь 2025 оны анхны цол олгох барилдаан байх юм. Оролцогч бөхчүүдийг чансаагаар эрэмбэлж бүртгэж байгаа талаар МҮБХ мэдээлжээ. Харин дараагийн өдөр буюу зургаадугаар сарын 7-нд Монгол Улсын арслан Б.Яндааг алдаршуулсан улс, аймаг, цэргийн цолтой 128 бөхийн барилдаан болно.

Өмнө нь хоёр ч удаа хойшлоод байсан нийслэлийн аварга шалгаруулах 3х3 багийн барилдаан энэ сарын 8, 14-нд зохиогдоно. Үүний үеэр чансаа өндөртэй найман бөхөд хүндэтгэл үзүүлэх аж.

Зургаадугаар сарын 12, 13-нд чөлөөт бөхийн “Арслан” клубын нэрэмжит “Залгамжлагч” тэмцээн зохион байгуулагдаж, 9–14 насны хүүхдүүд авьяас, ур чадвараа сорин өрсөлдөнө.

Харин бөх сонирхогчдын хүсэн хүлээдэг наадмын сорилго барилдаан “Нийслэлийн иргэдийн өдөр”-ийн хүрээнд болж, улс, аймаг, цэрэг, сумын цолтой 256 бөх зодоглох юм. Үүнээс гадна буриад болон өвөрмонголын 64 бөхийн барилдаан ч энэ үеэр зохион байгуулагдахаар төлөвлөгдсөн бөгөөд ингэснээр Монголын үндэсний бөхийн холбооны 2024–2025 оны улирлын барилдаанууд өндөрлөх юм.

Эх сурвалж: Монголын үндэсний бөхийн холбоо