Монголын хүүхдийн спортын зуны VIII наадам долоо дахь өдрөө үргэлжилж байна. Энэ удаагийн наадамд 21 аймаг, нийслэлийн есөн дүүргээс шалгарсан 9–17 насны нийт 6120 тамирчин оролцож, 31 төрлийн спортын төрөлд 271 багц медалийн төлөө өрсөлдөж буй нь улсын хэмжээнд зохион байгуулагдаж буй хамгийн өргөн хүрээтэй спортын арга хэмжээнүүдийн нэг болж байна.
Энэхүү тэмцээн нь хүүхэд, өсвөр үеийнхэнд спортын амжилт гаргах, авьяасаа хөгжүүлэх, хамтын ажиллагаа, тэсвэр хатуужлыг суулгах чухал алхам болдгоороо онцлог. Шигшээ шатанд шалгарсан баг тамирчид өөрсдийн аймаг, дүүргээ төлөөлөн нэр төрийн хэрэг болгон оролцож байна.
Өнөөдрийн байдлаар волейбол, хөлбөмбөг, дуатлон, ширээний теннисний төрлүүдийн тэмцээнүүд өндөрлөж, шилдэгүүд тодорч, медалийн эзэд тодрох үйл явц үргэлжилж байна. Наадмын төгсгөл хүртэл бусад төрлийн тэмцээнүүд шат дараатайгаар явагдах юм.
Эх сурвалж: Биеийн тамир, спортын улсын хороо
