Халдварт өвчин судлалын үндэсний төвөөс 2025 оны тавдугаар сарын 30-ны байдлаарх улаанбурхан өвчний нөхцөл байдлыг танилцууллаа. Уг мэдээллээр улаанбурхан өвчний лабораториор батлагдсан нийт тохиолдол 4274, эмнэлэгт хэвтэн эмчлүүлж байгаа хүн 551, гэрээр эмчлүүлж буй хүн 938, эдгэрсэн 2793, хавьтал 44,774, нас баралт 2 бүртгэгдээд байна.

Улаанбурхан нь халдварлах чадвар өндөртэй, хүүхэд, өсвөр үеийнхэн дунд эрчимтэй тархдаг, гэхдээ вакцинаар бүрэн сэргийлэх боломжтой халдварт өвчин юм. Энэ удаагийн халдварын тархалт нь голчлон ерөнхий боловсролын сургуульд гарч байгаатай холбоотой бөгөөд хүүхдүүд, хамт сурч буй хүмүүсийн дунд хурдтай тархаж буйг мэргэжилтнүүд онцолж байна.

Иймээс улаанбурханы эсрэг вакцинд хамрагдах нь халдвараас сэргийлэх хамгийн үр дүнтэй арга гэдгийг ХӨСҮТ санууллаа. Халдвараас өөрийгөө болон ойр дотнын хүмүүсээ хамгаалахын тулд:

• хүүхдээ тогтсон хугацаанд нь вакцинд хамруулах,

• сургуулийн орчинд өвчтэй хүүхдийг тусгаарлах,

• халдвар илэрсэн бол эмнэлгийн байгууллагад яаралтай хандах,

• халдварт өвчин гарсан газруудад зорчихоос зайлсхийх хэрэгтэйг зөвлөж байна.

Эрүүл мэндийн байгууллагаас нийт иргэдэд хувийн ариун цэврийг сахих, олон нийтийн газар амны хаалт хэрэглэх, вакцинд идэвхтэй хамрагдах зэргээр халдвараас урьдчилан сэргийлэхийг уриалж байна.

Эх сурвалж: ХӨСҮТ