Польшийн Вроцлав хотод болсон 2025 оны Конференцийн лигийн финалын тоглолтод Английн “Челси” баг Испанийн “Бетис”-ийг 4:1 харьцаагаар илт давуу хожлоо. Энэ тоглолтод англичуудаас Энцо Фернандес (65’), Николас Жексон (70’), Жейдон Санчо (83’), Мойзес Кайседо (90+1’) нар гоол оруулсан бол “Бетис”-ийн цорын ганц гоолыг Абде Эззальзули (9’) хийв.

Энэхүү ялалтаар “Челси” Европын клубүүдийн гол тэмцээнүүд болох:

• Аваргуудын лиг (2012, 2021),

• Европын лиг (2013, 2019),

• Цомтой багуудын цом (1971, 1998),

• УЕФА-гийн Супер цом (1998, 2021),

• Конференцийн лиг (2024/25)

гэдэг бүх тэмцээнд түрүүлсэн Европын анхны баг боллоо.

Харин “Бетис” хувьд Конференцийн лигийн финалд шалгарсан Испанийн анхны клуб болж нэрээ үлдээв. Тэд энэ улирлын Ла Лигт 6 дугаар байр эзэлснээр 2025/26 оны Европын лигийн тэмцээнд оролцох эрхээ аваад байна.

“Челси”-г удирдсан Италийн дасгалжуулагч Энцо Мареска өмнө нь “Парма”, “Лестер” багуудыг дасгалжуулж байсан бөгөөд түүний карьерын нэгэн онцлог нь 2018-2019 онд “Уэст Хэм”-ийн Чили дасгалжуулагч Мануэл Пеллегринигийн туслах дасгалжуулагчаар ажиллаж байсан явдал юм. Харин Пеллегрини одоо “Бетис”-ийн ахлах дасгалжуулагчаар ажиллаж байна.

Энэ хоёр баг өмнө нь түүхэндээ таван удаа тоглоход “Челси” дөрөвт нь ялж байжээ. Конференцийн лигийн өмнөх аваргууд нь:

• 2021/22 – “Рома” (Итали)

• 2022/23 – “Уэст Хэм” (Англи)

• 2023/24 – “Олимпиакос” (Грек) багууд байсан юм.

Эх сурвалж: ТАСС