Эмэгтэйчүүдийн волейболын “Үндэстнүүдийн цом”-ын тэмцээн энэ зургадугаар сарын 7-нд Вьетнамын Ханой хотод эхэлнэ. Долоо хоног үргэлжлэх тус тэмцээнд Ази, Номхон далайн бүсийн 11 орны баг хоёр хэсэгт хуваагдан өрсөлдөхөөр болжээ. Оролцогч орнуудын тоонд Монгол Улс багтсан нь манай эмэгтэйчүүдийн шигшээ баг олон улсын чанартай томоохон тэмцээнд дахин оролцож буйг илтгэж байна.

Монголын волейболын холбооноос 33 тамирчин бүхий өргөтгөсөн бүрэлдэхүүнийг зарлаж, албан ёсны бэлтгэлээ дөрөвдүгээр сарын 8-нд эхлүүлсэн. Улмаар 18 хоногийн өмнө Ханойг зориулах 14 үндсэн тоглогчийг эцэслэн сонгосон бөгөөд бэлтгэлээ сэргэлтийн горимоор үргэлжлүүлж байна. Багийн ахлагчаар П.Энххүслэн ажиллаж буй бол багийн бүрэлдэхүүнд Г.Энхнаран, Б.Нинжболор, Г.Хандсүрэн, Б.Амарбаясгалан, Н.Номин, Г.Энхзул, Г.Саруулгэрэл, Д.Анужин, Д.Намуун, О.Эрдэнэ-Энх, М.Санчирмаа, Э.Анударь, С.Нарангуа нар багтжээ. Дундаж нас нь 24 бөгөөд хамгийн залуу тоглогч нь “Улаанбаатар финикс” багийн 19 настай Б.Амарбаясгалан юм.

Дасгалжуулагчийн багт Б.Хэрлэн (ахлах дасгалжуулагч), А.Мөнх-Эрдэнэ, Э.Энхтөгс (туслах дасгалжуулагч), М.Энхболд (трэйнер), Д.Отгонхүү (статистикийн шинжээч) нар багтсан байна.

Манай баг сүүлд Зүүн Азийн аварга шалгаруулах тэмцээнд оролцож долдугаар байр эзэлсэн бол энэ удаа медалийн болзол хангах зорилготойгоор өрсөлдөх гэж байна. Монголын баг зургаадугаар сарын 4-нд Вьетнамыг зорино.

Монголын шигшээ багийн хэсгийн тоглолтын хуваарь:

• Зургаадугаар сарын 7 – Монгол vs Филиппин /16:00/

• Зургаадугаар сарын 8 – Казахстан vs Монгол /11:00/

• Зургаадугаар сарын 9 – Монгол vs Шинэ Зеланд /21:00/

• Зургаадугаар сарын 11 – Индонез vs Монгол /18:30/

• Зургаадугаар сарын 12 – Монгол vs Иран /13:30/

Эх сурвалж: Монголын волейболын холбоо