ЭХЭМҮТ, УГТЭ, ГССҮТ, СЭМҮТ зэрэг улсын хэмжээнд үйл ажиллагаа явуулдаг томоохон эмнэлгүүдийн эмч, мэргэжилтнүүд “Эрхэм нандин сувд” төрийн бус байгууллагатай хамтран хөгжлийн бэрхшээлтэй хүүхдүүдийг хамруулсан урьдчилан сэргийлэх, төрөлжсөн үзлэг оношилгооны арга хэмжээг амжилттай зохион байгууллаа. Тус үзлэгийг дөрвөн өдрийн турш зохион байгуулсан бөгөөд энэ нь хөгжлийн бэрхшээлтэй хүүхдүүдийн эмнэлгийн тусламж үйлчилгээний хүртээмжийг нэмэгдүүлэх, эрт оношилж, цаашдын эмчилгээ сувилгаа төлөвлөхөд чухал нөлөө үзүүлж байна.

Үзлэг оношилгоонд Улаанбаатар хот болон 14 аймгийн нийт 497 хүүхдийг хамруулж, давхардсан тоогоор 2161 хүүхдэд 18 төрөлжсөн чиглэлээр эмч нарын үзлэг, оношилгоо, эмчилгээ хийгджээ. Үүнд хүүхдийн мэдрэл, яс үений эмч, сэтгэцийн эрүүл мэнд, сэргээн засах болон хөдөлгөөн засал, дотор болон чих хамар хоолойн эмч нар зэрэг олон чиглэлийн мэргэжилтнүүд оролцсон байна.

Үзлэгийн явцад онош тодорхойлогдсон хүүхдүүдийн дундаас 21 хүүхдэд мэс заслын заалттай онош тогтоогдож, цаашид шаардлагатай мэс заслыг хийхээр төлөвлөн, холбогдох эмнэлгүүдэд шилжүүлжээ.

Тус үзлэг нь хөгжлийн бэрхшээлтэй хүүхдүүдэд цогц тусламж үзүүлэх, хөдөө орон нутгийн болон Улаанбаатарын алслагдсан бүсийн хүүхдүүдийг эрт илрүүлэгт хамруулах, улмаар хүүхдийн хөгжлийг дэмжихэд чиглэсэн чухал арга хэмжээ боллоо.

Эх сурвалж: ЭХЭМҮТ, УГТЭ, ГССҮТ, СЭМҮТ, Эрхэм нандин сувд ТББ