Испанийн хөл бөмбөгийн хүчирхэг баг “Барселона” залуу од Ламин Ямалтай байгуулсан гэрээгээ 2031 оны зургаадугаар сар хүртэл сунгаснаа албан ёсоор мэдэгдлээ. Клубийн цахим хуудсанд “2023 оны дөрөвдүгээр сарын 29-нд 15 настайдаа анхны тоглолтоо хийснээс хойш Ямал гайхалтай тоглолтуудаараа дэлхийн хөл бөмбөгийн тавцанд хүч түрэн гарч ирлээ” хэмээн дурджээ.

Өдгөө 17 настай тэрбээр Барселонагийн академид хүмүүжиж, үндсэн бүрэлдэхүүнд багтан 2024/25 оны улиралд Испанийн лиг, цом, супер цом зэрэг гурван томоохон тэмцээнд түрүүлсэн амжилттайгаар улирлыг дуусгав. Тэр улиралд 55 тоглолтонд оролцож, 18 гоол оруулан, 25 оновчтой дамжуулалт өгсөн байна. Мөн 15 настайдаа Испанийн лигийн аваргын хүндэт цомыг хүртэж байсан түүхтэй.

Түүнчлэн Ямал Испанийн шигшээ багийн бүрэлдэхүүнд багтаж, 2024 оны Европын АШТ-д түрүүлж, хамгийн залуу шилдэг тоглогчоор тодорсон бөгөөд өнөөдрийг хүртэл шигшээд 19 тоглолт хийж, 4 гоол, 9 дамжуулалт өгөөд байна.

2024 оны аравдугаар сард тэрбээр France Football сэтгүүлээс дэлхийн шилдэг залуу тоглогч, арваннэгдүгээр сард Tuttosport сониноос олгодог Golden Boy шагналын эзнээр шалгарсан юм.

Ямалыг 2025/26 оны улирлаас эхлэн “10 дугаар” өмсгөлтэй тоглоно гэж мэдээлж буй бөгөөд энэ дугаарыг өмнө нь Лионел Месси, Диего Марадона, Роналдиньо зэрэг домогт хөлбөмбөгчид зүүж байв. Шинэ гэрээний дагуу түүний жилийн цалин 15 сая евро, бонус багтсан тохиолдолд нийт орлого нь 20 сая еврод хүрэх юм.

Хамгийн сүүлийн мэдээгээр, “Барселона” баг Испанийн цомын тэмцээний финалд “Реал Мадрид”-ыг нэмэлт цагт 3:2-оор хожиж, цомын эзэн болжээ.

Эх сурвалж: ТАСС