Биеийн тамир, спортын тухай хуулийн 9.2 дахь заалтын дагуу Монгол Улсын Засгийн газрын 2024 оны наймдугаар сарын 21-ний өдрийн 21 дүгээр тогтоолоор Олимп, паралимпын наадамд оролцох үндэсний шигшээ багийн бэлтгэлийг удирдан зохион байгуулах үндэсний хороог шинэчлэн байгуулсан бөгөөд уг хорооны 2025 оны анхдугаар хуралдаан тавдугаар сарын 27-ны өдөр амжилттай боллоо.
Уг үндэсний хороо нь төрийн захиргааны байгууллага, төрийн өмчит компани, төрийн бус байгууллага, үндэсний шигшээ багийн тамирчдын төлөөллөөс бүрдэж, олон талын оролцоотойгоор үйл ажиллагаагаа хэрэгжүүлж байна. Энэхүү хорооны гол зорилго нь олимп, паралимпын наадамд Монгол Улсыг төлөөлөн оролцох тамирчдын бэлтгэлийг төрийн бодлогоор тогтвортой дэмжих, шинжлэх ухаанд суурилсан систем бий болгох, санхүүжилтийг оновчтой төлөвлөхөд чиглэж буй юм.
Олимпын наадам бол улс орнуудын нэр хүндийг дэлхий дахинаа илэрхийлдэг, соёл, спортын дипломат хүчин зүйл бөгөөд монгол тамирчдын амжилт нь нийгэмд эерэг хандлага, үндэсний эв нэгдэл, залуусын үлгэр дуурайлал болохын зэрэгцээ нийгмийн эрүүл мэндэд чухал нөлөө үзүүлдэг гэж холбогдох байгууллагууд онцоллоо.
Соёл, спорт, аялал жуулчлал, залуучуудын яамны зүгээс хүн төрөлхтний спортын их баяр наадам болох “Лос-Анжелес – 2028” олимп, паралимпын наадамд оролцох Монгол Улсын Үндэсний шигшээ багийг өндөр түвшинд бэлтгэх зорилгоор нэгдсэн стратеги төлөвлөгөө боловсруулан хэрэгжүүлэх ажлыг эхлүүлээд байна. Энэ хүрээнд бэлтгэлийн бааз, тоног төхөөрөмж, эмчилгээ үйлчилгээ, дэмжих мэргэжилтнүүдийн оролцоог шинжлэх ухаанч, үр дүнтэй болгох цогц арга хэмжээг шат дараатайгаар авч хэрэгжүүлэхээр төлөвлөжээ.
Эх сурвалж: Соёл, спорт, аялал жуулчлал, залуучуудын яам
