Жил бүр уламжлал болгон зохион байгуулдаг “УИХ-ын цом” шилжин явах цомын төлөөх спортын тэмцээн 2025 оны тавдугаар сарын 24-ний өдөр албан ёсоор эхэллээ. Энэхүү арга хэмжээ нь Улсын Их Хурал, түүний Тамгын газар болон УИХ-д тайлангаа шууд өгдөг байгууллагуудын албан хаагчдын бие бялдрыг хөгжүүлэх, чөлөөт цагийг зөв боловсон өнгөрүүлэх зорилготойгоор жил бүр зохион байгуулагддаг бөгөөд энэ жилийн тэмцээнийг Санхүүгийн зохицуулах хороо хариуцан зохион байгуулж байна.
Тэмцээн нийт таван төрлөөр явагдаж байгаа бөгөөд оролцогчид шатар, ширээний теннис, буудлага, волейбол, сагсан бөмбөгийн төрлүүдээр ур чадвар, авхаалж самбаагаа сорин өрсөлдөж байна. Энэ удаагийн наадамд нийт 13 байгууллагын 600 орчим албан хаагч, тамирчин оролцож байгаагаараа онцлог болж байна.
Нээлтийн үйл ажиллагааг Улсын Их Хурлын Ерөнхий нарийн бичгийн дарга Б.Баасандорж нээж, Улсын Их Хурлын гишүүд болон оролцогч байгууллагуудын удирдлагууд хүрэлцэн ирсэн талаар УИХ-ын Хэвлэл мэдээллийн газраас мэдээлэв.
Эх сурвалж: Улсын Их Хурлын Хэвлэл мэдээллийн газар
