Италийн алдарт дасгалжуулагч Карло Анчелотти Бразилын шигшээ багийг 2026 оны Дэлхийн аваргад бэлтгэх ахлах дасгалжуулагчаар томилогдсон талаар Бразилын хөл бөмбөгийн холбоо энэ сарын 12-нд албан ёсоор мэдэгдлээ. Тэрээр саяхан анхны хэвлэлийн хурлаа хийж, энэхүү томилгоо нь түүнд ихээхэн нэр хүнд, өндөр хариуцлага авчирч байгааг онцолсон байна.
Анчелотти “Би Бразилыг дэлхийн зургаа дахь удаагийн аварга болгох хүндтэй үүргийг дуртайяа хүлээж байна. Энэ бол надад итгэж өгсөн итгэл юм. Би 1980-аад оноос хойш Бразилын хөл бөмбөгтэй нягт холбоотой байсан. Олон шилдэг тоглогчидтой хамт ажиллаж байсан. Тэднийг бүгдийг нэрлэж чадна” хэмээн сэтгэл хөдлөлтэй ярьжээ. Түүний нэр дурдсан тоглогчдын дунд Роналдиньо, Роналдо, Кака, Дида, Кафу, Винисиус, Родриго зэрэг Бразилын үе үеийн одууд багтаж байгаа нь анхаарал татна.
Италийн шигшээг биш, яагаад Бразилыг сонгосон бэ гэсэн асуултад “Италид дасгалжуулагч байна, харин Бразил надад итгэл хүлээлгэсэн. Тэд таван удаа дэлхийн аварга байсан, харин одоо зургаа дахь удаагаа түрүүлэх зорилготой. Тиймээс намайг урьсан юм” хэмээн тодорхой хариулжээ.
Анчелоттигийн гэрээ 2026 оны ДАШТ хүртэл хүчинтэй бөгөөд тэрбээр ирэх зургадугаар сард болох Эквадор, Парагвайтай хийх урьдчилсан шатны тоглолтуудад багийг бэлтгэнэ. Түүний дасгалжуулсан багууд олон улсын тавцанд өндөр амжилт үзүүлж ирсэн. Тэрээр “Милан”-ы хамтаар хоёр, “Реал Мадрид”-ын хамтаар гурван удаа Аваргуудын лигийн цом хүртэж, энэхүү тэмцээнд хамгийн олон удаа түрүүлсэн дасгалжуулагч болжээ.
Эх сурвалж: РИА Новости
