Английн Премьер лигийн 2024-2025 оны улирал өчигдөр өндөрлөж, аваргын болзлоо аль хэдийн хангасан “Ливерпүүл” баг сүүлийн тоглолтоо “Кристал Пэлас”-ын эсрэг хийж, 1:1 харьцаатай тэнцлээ. Тоглолтын дараа “Энфилд” цэнгэлдэх хүрээлэнд аваргын шагнал гардуулах ёслол болж, багийн тамирчид, дасгалжуулагч нар, хөгжөөн дэмжигчид хамтдаа бахдам ялалтаа тэмдэглэлээ.

Арне Слотын удирдлага дор амжилттай тоглосон “улаанууд” нийт 34 тоглолтод 84 оноо цуглуулж, өрсөлдөгч багуудын гүйцэх боломжгүй болгосноор Английн Премьер лигийн 20 дахь удаагийн аварга боллоо. Тэд аваргын болзлыг дөрвөн тойргийн өмнө “Тоттенхэм”-ийг 5:1 харьцаатай бут ниргэснээр хангаж байсан юм.

Энэхүү амжилт нь зөвхөн энэ улирлын онцлох үйл явдал байгаад зогсохгүй, “Ливерпүүл” клубийн түүхэн амжилтыг бататгасан явдал боллоо. Тус баг Английн Премьер лигийн 20 удаагийн түрүүнээс гадна:

• УЕФА-гийн Аваргуудын лигт 6 удаа,

• УЕФА-гийн цомд 3 удаа,

• УЕФА-гийн Супер цомд 4 удаа,

• Английн лигийн цомд 10 удаа тус тус түрүүлээд байгаа нь тэднийг Английн хамгийн амжилттай клубүүдийн нэг болгож байна.

Шагнал гардуулах ёслолд онцгой зочноор “Ливерпүүл”-ийн домогт дасгалжуулагч Юрген Клопп оролцсон нь үзэгчдийн сэтгэлийг хөдөлгөсөн үйл явдал болжээ. Тэрбээр “Энфилд”-д буцаж ирсэн тухайгаа дурсан, сэтгэл догдлуулсан зургууд болон нийтлэл хуваалцсан байна.

Харин энэ улирлын хоёрдугаар байрт “Арсенал” (74 оноо), гуравдугаар байрт “Манчестер Сити” (71 оноо), дөрөвдүгээр байрт “Челси” (69 оноо), тавдугаар байрт “Ньюкасл” (66 оноо) оржээ.

Эх сурвалж: www.euro-football.ru