Францын Марсель хотод болсон 3х3 төрлийн эмэгтэйчүүдийн сагсан бөмбөгийн олон улсын тэмцээнд “Улаанбаатар Амазонс” баг гуравдугаар байрт шалгарч, Монголын сагсан бөмбөгийн түүхэнд дахин нэг бахархалтай хуудсыг нэмлээ. Энэ тэмцээнд Монгол Улсаас анх удаа “Улаанбаатар Амазонс”, “Монголиа” гэсэн хоёр эмэгтэй баг оролцсон бөгөөд “Амазонс”-ын охид хүрэл медалийн эзэн боллоо.

Хэсгийн шатанд тэд Филиппиний багийг 19:16-гаар, нутаг нэгт “Монголиа”-г 16:8-аар хожиж хэсгээ тэргүүлсэн юм. Улмаар шөвгийн наймд Унгарын “Гёор” багийг 13:10-аар буулган авч, хагас шигшээд шалгарсан ч Испанийн шигшээ багт 21:12-оор хожигдон финалд үлдэж чадсангүй. Испанийн баг нь энэ оны Европын аварга, Парисын олимпын мөнгөн медальт хүчирхэг өрсөлдөгч байсан юм.

Ингэснээр “Улаанбаатар Амазонс” гурван хожил, нэг хожигдолтойгоор тэмцээнийг гуравдугаар байраар өндөрлүүлж, 8000 ам.долларын мөнгөн шагнал хүртлээ. Багийн бүрэлдэхүүнд Б.Ариунцэцэг, О.Хулан, Н.Нандинхүсэл, Б.Болор-Эрдэнэ нар багтсан бөгөөд тэд өмнөх цуврал тэмцээнд мөн гуравдугаар байрт шалгарч байсан нь Монголын эмэгтэй 3х3 төрлийн тоглолт улам хүчирхэг болж байгааг харуулж байна.