АНУ-ын хоккейчдын шигшээ баг 2025 оны хоккейн дэлхийн аварга шалгаруулах тэмцээний финалын тоглолтод Швейцарыг нэмэлт цагт 1:0-ийн харьцаатайгаар хожиж, 1960 оноос хойш анх удаа дэлхийн аварга цол хүртлээ. Энэ тоглолт Стокхолм хотод болж, шөвгийн тоглолтдоо хаалгандаа гоол алдаагүй ирсэн Швейцарын багийн хувьд тун харамсалтай хожигдол боллоо.

Тоглолтын цорын ганц гоолыг нэмэлт цагийн 63 дахь минутад Тэйж Томпсон оруулсан байна. Швейцарын хаалгач Леонардо Женони энэ тоглолтод шилдэг амжилт үзүүлсэн ч ганц гоол алдсан нь багтаа үнэтэй туссан юм. Түүнийг ДАШТ-ий хамгийн үнэ цэнэтэй тоглогчоор шалгаруулж, бэлгэдлийн шигшээ багт нэрлэжээ.

Шагналт тамирчид:

• Шилдэг хамгаалагч: Зак Веренски (АНУ, “Коламбус”)

• Шилдэг довтлогч: Давид Пастрняк (Чех)

Тэмцээний сүүлчийн тоглолтын үеэр АНУ-ын тоглогчид 2024 онд автомашины ослоор амиа алдсан шигшээ багийн тоглогч Жонни Годро болон түүний дүүгийн зурагтай свитер өмсөн, хамгаалалтын малгай дээр дурсгалын наалт наасан байжээ. Энэ нь багийн хувьд сэтгэл зүйн онцгой дурсамж агуулсан тэмцээн болсон гэдгийг илтгэж байна.

Канадын баг хүлээлт хангаж чадсангүй

Энэ жилийн ДАШТ Швед ба Данид болсон бөгөөд финалд Швейцар, АНУ-ын багууд үлдэнэ гэж урьдчилан таамаглаж байсан хүн цөөн байв. Харин Канадын шигшээ бүрэлдэхүүндээ Сидни Кросби, Натан Маккинон, Маклин Селебрини зэрэг оддыг багтаасан ч Данийн багт хожигдсон нь олныг гайхашруулсан. Данийн хаалгач Фредерик Диков 40 гаруй цохилтыг хааж, Ник Олесен шийдвэрлэх гоолыг оруулжээ.

Чансаанд гарсан өөрчлөлт:

Швейцарийн баг түрүүлсэн бол дэлхийн чансааг тэргүүлэх байв. Гэвч финалд хожигдсоноор:

• ОХУ (оролцоогүй ч оноогоороо) – нэгдүгээр байр (3990 оноо)

• АНУ – хоёрдугаар байр (3985 оноо)

• Швейцарь – гуравдугаар байр (3975 оноо)

2026 оны ДАШТ Швейцарын Цюрих, Фрибур хотуудад болно. Анх 2020 онд эдгээр хотод болох ёстой байсан ч цар тахлын улмаас хойшлогдсон билээ.

Эх сурвалж: TASS