“Реал Мадрид” багийн домогт хагас хамгаалагч, Хорватын шигшээ багийн ахлагч асан Лука Модрич энэ зун болох клубүүдийн ДАШТ-ий дараа Испанийн аварга багаасаа явна гэдгээ албан ёсоор мэдэгдлээ. Тэрбээр Инстаграм хуудсандаа “Бямба гарагт Сантьяго Бернабеу цэнгэлдэхэд сүүлийн тоглолтоо хийнэ. Би бахархал, талархал, мартагдашгүй дурсамжтайгаар клубээ орхиж байна” хэмээн бичжээ.

Модрич 2012 онд “Тоттенхэм”-ээс 35 сая еврогийн гэрээгээр ирж, эхэндээ тогтвортой байр суурь олоход бэрхшээлтэй байсан ч удалгүй багийн салшгүй хэсэг болж чадсан. Тэрээр “Реал”-ын бүрэлдэхүүнд 600 орчим тоглолтод оролцож, Аваргуудын лигт зургаа, Испанийн Ла Лигт дөрвөн удаа түрүүлэн нийт 28 цом хүртсэн юм.

2018 онд “Алтан бөмбөг” шагнал хүртэж, дэлхийн шилдэг хөлбөмбөгчнөөр нэрлэгдсэн Лука Модрич тэр жил Хорватын шигшээг ахлан ДАШТ-д дэд байрт хүргэсэн. Тэрбээр өнгөрсөн зун клубтэйгээ гэрээгээ 2025 оны зургадугаар сар хүртэл сунгасан ч клубүүдийн ДАШТ-ий дараа явна гэдгээ албан ёсоор зарлалаа.

“Реал Мадрид”-ын ерөнхийлөгч Флорентино Перез түүнийг “клубийн үнэт зүйлсийг тээгч, түүхэн тоглогч” хэмээн тодорхойлж, Модричийг багийнхаа хамгийн олон цом хүртсэн тоглогчоор нэрлэв. Тэрбээр 590 тоглолтод 43 гоол оруулсан амжилтаараа клубийн хамгийн олон тоглолтод оролцсон тоглогчдын есдүгээр байрт бичигдэж байна.

Эх сурвалж: AFP