Олон улсын олимпын хороо (ОУОХ)-ны гишүүн, Монголын Үндэсний олимпын хороо (МҮОХ)-ны Ерөнхийлөгч Б.Баттүшиг булангийн орнууд руу хийсэн айлчлалынхаа хүрээнд Бахрейн, Катарын ҮОХ-ны удирдлагуудтай уулзаж, спорт, олимпизмын чиглэлээр хамтран ажиллах асуудлаар санал солилцлоо.

Энэхүү айлчлалын хүрээнд Катарын ҮОХ-ны Ерөнхийлөгч Шейх Жоаан бин Хамад Аль Тани, Ерөнхий нарийн бичгийн дарга Жассим бин Рашид Аль Буэнаин болон Монгол Улсаас Кувейт улсад суугаа Элчин сайд П.Сэргэлэн нарын оролцоотойгоор хамтын ажиллагааны санамж бичигт гарын үсэг зурсан юм. Ёслолын ажиллагаа Катарын нийслэл Доха хотноо болж өнгөрөв.

Катарын ҮОХ-ны Ерөнхийлөгч Шейх Жоаан бин Хамад Аль Тани, “Хоёр орны олимпын хороодын харилцааг шинэ түвшинд гаргах энэ санамж бичиг нь спортын амжилт, баг тамирчдын хамтын ажиллагааг өргөжүүлэхэд чухал түлхэц болно. Бид хамтарсан хөтөлбөрүүд хэрэгжүүлж, олимпын зорилтоо ахиулахыг тэсэн ядан хүлээж байна” хэмээн онцоллоо.

Катар улс нь олон улсын спортын гол цөм болж буй орны нэг бөгөөд:

• 2030 онд XXI Азийн наадам зохион байгуулах эрхтэй

• 2006 онд Азийн наадмыг амжилттай зохион байгуулж байв

• 2025 онд ФИФА U17 дэлхийн цом, ширээний теннисний ДАШТ, Формула-1 Гран При, бууудлага спортын дэлхийн цом зэрэг дэлхийн хэмжээний тэмцээн уралдаануудыг зохион байгуулах хуваарьтай байна

Тус улсын спортын дэд бүтэц, олон улсын нэр хүнд, зохион байгуулалтын чадвар улам бүр өсөж буй энэ үед Монголын ҮОХ-ны зүгээс хамтын ажиллагаагаа өргөтгөж буй нь олимпын хөдөлгөөний хөгжил, тамирчдын оролцоог нэмэгдүүлэхэд онцгой ач холбогдолтой алхам болж байна.

Эх сурвалж: МҮОХ